Ulah besebana ba laman rama ukai chara engkeman nemu isu sepital
SIBU: Mantaika sebana nengah laman rama ukai chara ke engkeman enti deka nemu sebarang penerang tauka isu ti bekaul enggau sepital.
Sapit Direktor Pengerai Opis Pengerai Nengeri Dr Kamarudin Lajim madah, sebana ke dibantai ba Facebook nya endang datai ari orang ke enda nemu tang rindu nampung jaku ari orang bukai.
Ku iya, ulah nya enda ulih nyaut sebana sida enti sida enggai betanya terus ngelawa piak sepital.
“Piak kami ulih nyaut sebana nya tang sida ke ngaga sebana tu patut betemu mua enggau kami.
“Tu ukai nganu sida laban kitai endang enda ulih nyalahka sida tang deka meri sida penerang ke bendar,” pia ku iya madah.
Iya mantaika jaku tu maya ngarika Direktor Opis Pengerai Nengeri Sarawak Dr Jamilah Hashim bejadika Hari Tebuka Sepital Sibu 2016 ti bela berebak enggau pengerami bejadi Bulan Kaunseling Renggat Sepital Sibu ba Sepital Sibu ditu, ensana.
Nambahka jaku iya, Dr Kamarudin madah, ulah bebantaika sebana nengah laman rama tu bela nuntung piak Sepital Sibu.
Iya madah, ambika banding, baka sebana ti bekaul enggau palan paking kerita ba Sepital Sibu.
“Kitai nemu ukai kitai enda ulih mutarka tang bisi mega sesebengkah sebana mensia mayuh enda ulih diputarka tekala nya.
“Ambika banding baka sebana bekaul enggau palan paking kerita di Sepital Sibu.
“Tu bisi chara iya empu iya nya baka piak sepital nganjung langkar tauka peminta ngagai opis menteri ti bekaul lalu ditangkan ke nya peminta deka diperatika dulu sebedau ulih digaga,” ku iya sambil madah pengawa nya bela bekenaka timpuh ti lama.
Kelimpah ari nya, Dr Kamarudin mega madah, Sepital Sibu udah lama lalu pengawa ngemanahka sepital nya endang digaga nitihka pematut sereta ngira ni bagi ke deka dikemanahka dulu.
Berindik ari pekara nya, iya ngarapka mensia mayuh ulih datai terus betemu enggau piak sepital nyema bisi pekara deka ditanya.
“Kitai ngelaluka mensia mayuh datai betanya ngagai piak sepital lebih agi enti deka nemu pekara ti bekaul enggau servis ari sepital,” pia ku iya madah.
Bekenangka program ke diatur, Dr Kamarudin madah, awak tu engkeman dikena mensia mayuh meda sereta nanya nama servis enggau pengawa ke bisi dipejalai Sepital Sibu.
Berebak enggau tu mega Chairman Ahli Lembaga Pelawat Hospital Sibu Dr Hu Chang Hock ngarika komiti iya nyuaka pemeri ke beungkus RM45,900 ngagai Sepital Sibu.
Pemeri tu nyengkaum 90 iti mija kelimpah puku dikena ngemanahka Wad 16 ba sepital nya.
Sama bela isi datai maya tu iya nya Direktor Sepital Sibu Dr Ngian Hie Ung, Ketuai Unit Kaunseling Sepital Sibu Hamidah Khushi Mohd sereta bala bukai.