Penguang mujur bejadika program Belangkau JOTA-JOTI Pelilih Baram
MARUDI: Menteri Muda Kaunsil Kandang Menua, Datu Dr. Penguang udah mujur bejadika program Jamboree on the air (JOTA) enggau Jamboree in the Internet (JOTI) Ke-59 Taun Renggat Pelilih Baram.
“Aku berasai gaga endar laban tu keterubah aku datai ba Sekula Sekondari (SMK) Marudi pengudah aku ngejang ari Marudi dalam taun 1971 kelia. Aku mega kala besekula ditu ari taun 1967 ngagai 1971, lalu diatu umur aku pen udah manggai 62 taun,” ku iya ke mega Kaban Kunsil Nengeri ( ADUN) Marudi rambau program nya diatur ba Balai Mayuh Guna SMK Marudi, apin lama ke udah.
Program Belangkau JOTAJOTI diatur pengelama dua hari semalam aja lalu udah disereta raban pejilin ari mayuh bengkah sekula primari enggau sekula sekondari ditu sereta lebih ari 100 raban pejilin ke bukai.
Aktiviti tu manah endar diatur sereta dikena ngajar bala nembiak ngambika nyadi mensia ti menyana, ngajar sida ngidupka diri sereta ngasaika pengidup raban pejilin.
“Nyangka tu pengawa belangkau keterubah diatur ba Baram lalu kitai udah belajar mayuh pekara ari nya,” ku iya.
Ku Penguang nampung, nyadi pengari rayat enggau Barisan Nasional (BN) di Marudi, iya besemaya deka meri sebarang bantu sereta sukung rat ngagai SMK Marudi.
“Aku berutang enggau peranak Baram, nya alai pengudah gawa perintah pengelama 36 taun lalu diatu aku datai baru ba Baram deka nyapai pemujur dalam politik ba pekara pengelantang peranak Marudi.
“Kitai semua deka pulai sereta gawa ke pemaik SMK Marudi nentuka sekula tu ulih nyulut dalam pelajar sereta mujur dalam aktiviti lumba.
“Aku deka naka ulih mantu kita seagi –agi aku nyadi pengari kita,” ku iya.
Dulu agi ari nya, iya bisi nyuaka chek geram Projek Mit Pemansang Menua Pesisir ( MRP) penyampau RM20,000 ngagai SMK Marudi lalu RM5,000 da agi ngagai Serakup Pejilin Baram.
Sama bisi datai Kepala Pejilin Pelilih Baram, Mohd Fathi Ramli, Prinsipal Wong Hin Chai, pengari Opis Pelajar, Rokimin Imah enggau Inspektor Cheng Fook Ming, sereta Penghulu Ayub Hassan.