Lebih 2000 iku udah ngulu program kaunseling diatur piak Sepital Sibu
SIBU: Sepenyampau 2,370 iku mensia datai ngulu program kaunseling ke dipejalaika ba Sepital Sibu kenyau ari taun 2012 nyentuk ke sehari tu.
Pemesai Psikologi Kaunseling Hamidah Kushi Mohd madah, tu mungkur 2,300 kali program kaunseling enggau 73 bengkah program intervensi psikososial.
Ku iya, piak sida udah matih 57 iku Komiti Budaya Korporat ngambika ulih bejalaika 43 bengkah kus enggau 1,800 inventori psikologi.
“Bepun ari taun 2012, macham bengkah inisiatif udah dipejalaika dikena ngeringka agi servis unit Pskilogi Kaunseling di Sepital Sibu.
“Nyentuk ke sehari tu mega, kitai bisi tiga iku raban pengereja pengawa kelimpah 42 iku fasilitator ari macham bengkah pengawa enggau opis di sepital tu,” pia ku iya madah.
Iya mantaika pekara tu maya Hari Tebuka Sepital Sibu 2016 ti bela berebak enggau pengerami bejadi Bulan Kaunseling Renggat Sepital Sibu ba Sepital Sibu ditu, ensana.
Program nya dipenyadi Sapit Direktor Pengerai Opis Pengerai Nengeri Dr Kamarudin Lajim lalu bela digulu Direktor Sepital Sibu Dr Ngian Hie Ung.
Hamidah madah, pengawa ke dipejalai unit sida iya nya meri servis Psikologi Kaunseling ti mungkur lima iti bengkah pengawa.
Tu ku iya baka ‘Pertumbuhan dan Perkembangan’, ‘Pencegahan’, ‘Intervensi’, ‘Rawatan dan Terapi’ enggau ‘Pemulihan/ Rehabilitasi/ Intervensi Psikososial’.
Ba pekara ti bekaul, iya mega madah, sepemanjai bulan kaunseling tu, piak sida deka ngatur macham bengkah program baka Marathon CPE- CONTINOUS PSYCHOSOCIAL EDUCATION, Marathon Group Counseling, Marathon Intervensi Psikososial enggau Outreach Unit Psikologi Kaunseling.
“Ngarapka udah tu ila, mensia mayuh nyengkaum bala pengereja pengawa di sepital enda takut tauka sanggu betemu enggau kaunselor ketegal ti ngasaika diri nadai napi penanggul.
“Semua kitai meseti nemu penanggul ke nyadi tau ngeruga diri empu, ruang bilik enggau kereja.
“Enti salah alai endur mantaika penanggul nuntung diri, kitai deka lebih agi bepenanggul udah nya,” ku iya madahka baru.
Ngena awak tu, Hamidah meri besai terima kasih ngagai Dr Ngian ti semampai nyukung nama-nama program ke diatur unit sida.