Main Nimbak Laja patut dikomersialka kena narit penyereta ba tikas sekula
KAPIT: Lumba enggau Main Nimbak Laja patut dilakuka ngambi ulih narit nembiak ba sekula dipelilih tu lalu ulih nyadi seiti Kelab Lumba enggau Main ke baru.
Jaku tu udah dipansutka Kaban Kunsil Nengeri sitak Bukit Goram, Jefferson Jamit Unyat lebuh iya bejadika Program Nutup Pekit Nimbak Laja Tetutup Kapit 2016 ba Dewan Suarah apin lama ke udah.
Berebakka enggau nya, iya mega muji Gerempung Nimbak Laja Pelilih Kapit laban udah ngambi singkang ngelakuka kelab tu ba sekeda sekula di pelilih tu.
“Aku chukup temegah ati meda kita ulih nerima manah lumba enggau main baru ke dikomersialka tu taja pan gerempung tu baru aja ditumbuhka ba taun 2015 suba. Pia mega enggau tim sukarela ari pengajar sekula enggau sida ke bedagang udah meri sukung ti penuh ngagai gerempung tu. Dalam timpuh ke pandak aja, kita udah berengkah ngatur pekit ke bekaul enggau gerempung tu,”
“Tu ngayanka pengingin ke tinggi ngelakuka kelab Nimbak Laja ba sekula. Aku pechaya, mayuh bala sida ti enggau dalam lumba enggau main tu ulih nyadi seiku pemanah ke nyulut dudi hari ila. Bala atlit Nimbak Laja patut besabar sereta ngembuan ati ke rindu enggau terit lebuh ke belatih sebedau bulih asil ti manah ba pemutus dudi hari ila,” ku iya.
Pekit tu ke diulu sepenyampau empat puluh lima iku ari tiga buah sekula iya nya SMK Selirik, SMK Kapit enggau SJK Hock Lam lalu tiap sekula udah nganjung lima belas iku nembiak ke enggau pekit tu.
Ba program tu, Jamit udah nyerahka RM 7,000 geran perintah dikena gerempung tu bejalaika aktiviti sida ba taun 2017 ila.
Sama bisi datai, Chairman Gerempung Ting King Yiing, Chairman Pengatur Jack Kong, Sapit Chairman Tommy Wong, Pemesai Opis Nembiak enggau Lumba, Jack Janda, bala pengajar enggau ke bukai.