Penerang tumu ulih nerenak pengerindu nembiak dalam bidang TVET, ku Jemain
KUCHING: Penerang tumu pasal bidang teknikal enggau vokasional ngagai raban nembiak menengah baruh dikearapka ulih ngangkatka tikas penyedar dalam pengawa ngerembaika kereja ba sektor industri.
Sapit Direktor ( Sokongan Akademik) Politeknik Kuching Sarawak ( PKS), Jemain Ental madahka tuju meri penerang tumu sereta beratka pelajar enggau latih bidang teknikal enggau vokasional, iya nya dikena nempa pengerindu nembiak dalam bidang nya kelebih agi ke udah tembu ba Form Tiga.
“Nengah chara tu, kitai meri penerang tumu ngambika sida bisi pengerindu kereja dalam sektor industri nengah latih teknikal enggau vokasional.
“Ari tu, sida ( nembiak) ulih berunding sereta milih sekalika ngambi latih teknikal enggau vokasional tauka utai bukai,” ku iya.
Jemain mansutka pekara nya lebuh dikerandau pengudah bejadika Program ‘ Kesedaran Perindustrian dan Latihan Ke- 2’ ditu, kemari.
Ngenang pasal nya, iya madahka peminta ngagai pengereja pengawa bepengelandik tinggi amat kelebih agi pengudah SCORE ditumbuhka.
Berindik ari pekara nya, program ke dipejalaika nya senipak endar enggau juluk perintah ti deka meransang mayuh agi raban biak nyereta latih teknikal enggau vokasional.
Nitih ku Jemain, penyereta pengereja pengawa dalam bidang tu dipelabaka ulih napi peminta guna pengereja pengawa nengeri tu.
“Tu seraya nyukung pengawa perintah nengeri ti amat bebendar muka tauka nyendiaka peluang gawa ngagai raban nembiak di menua tu.
“Ari tu kitai ukai semina bepanggai ba pengereja pengawa ari menua luar, ukai kitai enda setuju tang enti ulih kitai deka nyendiaka peluang ngagai pengereja pengawa menua tu empu sama ngambi bagi dalam sektor industri,” ku iya.
Iya ngarapka pesereta ngambi peluang ari program ke diatur nya, awakka nemu enggau dalam agi pasal pemesai guna enggau pengelebih bidang teknikal enggau vokasional dalam proses pemansang di Sarawak.
Program dua hari nya, ti diatur 17 enggau 18 Oktober tu, bisi dipasuk 60 iku nembiak Form Tiga ari kandang menua Sebuyau.
Pesereta dibai bejalai ngagai makmal enggau bengkel di PKS bekunsika penerang pasal palan latih amali seraya diberi latih chara teori.