Opis Pemadah agi nyadi ejensi ke relevan, ku Aaron
Tu beduduk ari pemesai guna tanggungpengawa sida dalam ngerembaika polisi perintah ngagai rayat
SIBU: Opis Pemadah agi relevan nyadi sebengkah ejensi perintah ti bejalaika pangku pengawa beguna endar dalam ngerembaika polisi perintah ngagai peranak menua pesisir di Sarawak.
Kaban Parlimen ( MP) Kanowit Datuk Aaron Ago Dagang madah taja kemaya hari bisi bemacham perengka penyambung nyengkaum telefon pintar dikena nabur penerang tang opis nya tetap diguna dikena ngenuku penerang ke betul enggau pemadu baru ngagai rayat.
Nitih ku iya, opis tu berengkah ditumbuh di Sarawak dalam taun 1950 lalu dikelala nyadi Unit Penyambung Mensia Mayuh ba Sekretariat Perintah Nengeri Sarawak sebedau diangkat nyadi Palan Pemadah Perintah Sarawak (GSIS) ti ditumbuh perintah British maya nya.
“Endang enda ulih dikeenggai tanggungpengawa Opis Pemadah agi beguna sereta relevan dalam nabur polisi perintah ngagai peranak menua pesisir di Sarawak. Mayuh pengingat pait manis sida sekumbang iya udah ditumbuh.” ku iya lebuh ngintu genap taun ke106 Opis Pemadah Malaysia 1910-2016 renggat nengeri Sarawak ba Kompleks Islam ditu malam tadi.
Aaron madah, iya agi ingat baka ni Opis Pemadah di nengeri tu nyengkaum ba Sibu, alai pangku pengawa sida diguna rambau Pemerintahan Keselamatan Kawasan Rajang (RASCOM) beoperasyen urung 1960-an enggau 1970-an.
“Aku agi ingat opis tu kala dikumbai opis wayang alai sida bejalai ngelawa rumah-rumah panjai mandangka wayang gambar ngagai mensia mayuh,” ku iya nerang.
Berindik ari nya, iya ngan- sak sida ba opis nya ngambi nempa pemujur dulu suba nyadi peransang dalam napi pangku pengawa ti deka dipejalai dudi hari.
Kemaya hari tu, ku iya, opis nya enda ulih lari ari betapi enggau ubah sereta pemaru dalam bejalaika pangku pengawa sida berindik ari pemansang teknologi penyambung.
Sama bisi datai Direktor Pemadah Sarawak, Abang Sardon Abang Hashim sereta bala pemesai kanan enggau staf opis ari selampur nengeri tu. — Bernama
Endang enda ulih dikeenggai tanggungpengawa Opis Pemadah agi beguna sereta relevan dalam nabur polisi perintah ngagai peranak menua pesisir di Sarawak. Mayuh pengingat pait manis sida sekumbang iya udah ditumbuh. Datuk Aaron Ago Dagang Kaban Parlimen Kanowit