Bisi 88,950 pesakit berubat ba Klinik Kapit 2016

KAPIT: Klinik Pengerai Kapit, Bleteh bisi ngerikod 88, 950 iku pesakit ke datai berubat ba klinik tu sepanjai taun 2016.

Rikod tu dipansutka Direktor Klinik Pengerai Kapit, Dr Jusoh Awang Senik maya penemuai Senior Direktor Pengerai Ruang Bilik Opis Menteri Pengerai Malaysia, Toh Puan Dr Safurah Jaffar ba bilik aum Klinik Pengerai Kapit, Sebeleteh ditu, apin lama ke udah.

“Taun 2016, Klinik Pengerai Kapit,Bleteh udah ngerikod 88,950 iku pesakit. Ari penyampau nya 57,063 iku direjista berubat ba Wad Pesakit Luar enggau 31, 887 ba Wad Nembiak enggau Indu Ngandung,”ku iya

Klinik Pengerai Kapit mega nyediaka servis pengerai ba klinik pesakit luar, klinik nembiak enggau indu ngandung, farmasi, klinik ngeli, ruang x-ray (radiologi), unit tuberculosis enggau unit fisioterapi.

“Klinik Pengerai Kapit mega ngerejista lebih 800 iku pesakit diabetis nyengkaum sida ari Song, Kapit enggau Belaga ke udah direjista iya nya 3,400 iku bela ngidap penyakit diabetes. Ari penyampau nya mega, 20 peratus sida tu berumur urung 30 taun ke baruh,”ku Dr Jusoh.

Ngelansa pasak penyakit berampit baka HIV/AIDS dia Dr Jusoh madah, bisi 55 kes dirikod nyengkaum 30 kes pesakit gonorhea, 11 kes pesakit siflis, 9 kes HIV enggau 5 kes AIDS.

“Kami meseti tumu nyaga penyampau penyakit ke baka tu. Nya alai Teleprimari Servis (TPC) udah ditumbuh dikena ngerikod pemanah status pengerai sida ke sakit enggau ke bukai,”ku iya

Taja pia, Kapit begunaka derisa enggau pakar perubat ke mayuh agi gawa ba ulu sungai baka ba Pelilih Song enggau Belaga dikena ngemanahka tikas pengerai mensia mayuh.

Sama bisi datai Pemesai Pengerai Kapit, Dr Deborra Ngadan enggau ke bukai.