Besaup ngelakuka pengerami besai: Uggah
Anang semina ngelempai tanggungpengawa ngelakuka pengerami besai nya ba perintah aja
KUCHING: Perintah Nengeri meransang semua chakah agi ngelaku tauka meri kelala bekaul enggau pengerami besai di menua tu nyengkaum pengerami Gawai Dayak.
Sapit Kepala Menteri, Datuk Amar Douglas Uggah Embas madah, ngelaku tauka meri kelala pengerami besai Gawai Dayak patut dikereja semua nyengkaum di Semenanjung Malaysia, berindik ari raban bansa Dayak ti mayuh diau di menua nya.
“Kitai minta mayuh agi orang, opis kelebih agi media nasional nulung meri kelala tauka ngelakuka pengerami Gawai Dayak.
“Laban kebendar raban bansa Dayak ulih ditemu tauka bisi diau di serata menua. Apin lama aku eng- gau YAB Kepala Menteri bisi ngulu pengerami mantar Gawai di Johor, urung 3,000 iku orang datai.
“Nya kebuah kitai ngarap sereta minta media bejalaika tanggungpengawa baka Radio Televisyen Malaysia (RTM) patut ulih berengkah malam tu (kemari) madahka meri Selamat Hari Gawai,” ku iya.
Uggah mansutka pekara nya lebuh dikerandau ba sebengkah aum pengerang berita ke diatur ba Bilik Aum Ringkat 2 Wisma Bapa Malaysia ditu, kemari.
Berebak enggau tu, iya mega ngarapka piak peribit ulih mantu ngelakuka pengerami besai baka Gawai Dayak di menua tu, kelimpah ari pengerami Hari Raya enggau ke bukai.
Laban tanggunpengawa meri kelala tauka ngelakuka pengerami besai di menua tu ukai semina bepanggai ba perintah aja.
Dalam penerang berita ari Parti Bansa Dayak Sarawak Baru ( PBDS), sida mega minta piak bekaul chakah agi ngelakuka pengerami besai nyengkaum Gawai Dayak.
Penerang berita ari Media enggau Penyambung PBDS Baru, pengerami ke dikerami di nengeri tu enda ngira bansa enggau jalai pengarap patut dikelaku sereta diangkatka sama sebela.
“Kami minta sida ti megai kuasa kelebih agi sida dalam Opis Menteri Dagang Temuai, berunding chara ke engkeman agi dikena meri pengelala ngagai pengerami ti nguntungka semua raban bansa,” ku penerang berita nya.
Kitai minta mayuh agi orang, opis kelebih agi media nasional nulung meri kelala tauka ngelakuka pengerami Gawai Dayak. Datuk Amar Douglas Uggah Embas Sapit Kepala Menteri Sarawak