Titihka undang-undang jalai alun

SERIAN: Ulah bepegaika telefon binching maya bebai perengka pengangkut entara kebuah ke pemadu tinggi ti ngujungka kes bebadi di jalai alun.

Ketuai Bagi Nyeliah Ulah Jai enggau Pengelikun Kontinjen Polis Sarawak SAC Shafie Ismail madah pekara nya ditemu asil pansik ke dipejalaika opis polis.

Berindik enggau nya, iya ngelalau orang be- baika perengka pengangkut nitihka undang- undang jalai alun.

“Bepegaika telefon binching mai bebai perengka pengangkut sigi salah ba undangundang.

“Ulah tu ngujungka penusah bebadi di jalai alun nyadi lalu entara ke pemadu tinggi,’ku iya.

Shafie mansutka jaku nya ba aum pengarang berita pengudah bejadi Ops Selamat nyerumba Pengerami Gawai Dayak 2017 di Serian kemari.

Ngenang kaul ke sama, Shafie madah statistik kes bebadi dijalai alun dalam timpuh 1 Januari nyentuk 24 Mei 2017 bisi kurang enti dibandingka enggau timpuh ke sama ba taun 2016.

Tajapan kurang, iya madah kes bebadi ti nabanka nyawa mengkang mayuh.

“Ungkup timpuh ke sama, penyampau kes bebadi di jalai alun nurun 303 kes(- 3.8 peratus) enti dibandingka enggau 2016 ke alai 8,055 kes dirikod ba 2016 ke alai 2017 ngerikod 7,752.

“Ari penyampau nya, kes bebadi nyawa nurun 28 kes(-17 peratus) iya nya 165 ba taun 2016 nyentuk ngagai 137 kes ba 2017,’ku iya.