Pengerami ke diintu pelasar ngemujur juluk 1 M’sia

Pengerami nya diintu begulai enggau bansa bukai ngambika ulih ngenanka penyerakup ba rayat

SRI AMAN: Kaban Kunsil Nengeri (ADUN) Lingga, Simoi Peri dekaka tetiap pengerami ke diintu pupu bansa di menua tu digaga nyadika pelasar endur ngemujur juluk 1 Malaysia ti ditengkebang Menteri sebedau tu.

Ku iya, endang patut tetiap pengerami ti diintu rayat Malaysia enda ngira di Sarawak tauka Sabah enggau Semenanjung Malaysia nyadi pengerami ke diintu semua pupu bansa, diintu begulai.

“Udah nyadi chara ba pengidup kitai kelebih agi di Sarawak ba tetiap beng- kah pengerami, kitai deka ngabang ngagai bala kaban engagu pangan diri enda ngira penuduk, pangkat sereta jalai pengarap laban nya ngelaika kitai tu sama magang dalam 1 Malaysia,” ku iya.

Simoi bejaku munyi nya lebuh bejadi Program Mantar Gawai di Rumah Brandah, Tanjung Rirang di Sri Aman ensanus.

Ku Simoi baru, ulah ti ngabang nya siti penyelai ke patut dipajakka dikena ngenanka penyerakup ba rayat pupu bansa.

“Penyerakup nya beguna amat dikena kitai mansang nyingkang ke mua.

“ngelama tu kitai ulih diau begulai laban kitai bebasaka batang pengarap enggau adat bansa bukai,” ku iya.

Nya alai rayat patut meri terima kasih ngagai perintah Barisan Nasional (BN) laban ngembuan polisi ti pemadu manah ungkup pupu bansa, ku iya.

Sama bisi ngulu pengerami nya, Kunsilor Nanang Kunjang, Kunsilor Lansing Bansi enggau ke bukai.

Udah nyadi chara ba pengidup kitai kelebih agi di Sarawak ba tetiap bengkah pengerami, kitai deka ngabang ngagai bala kaban enggau pangan diri enda ngira penuduk, pangkat sereta jalai pengarap laban nya ngelaika kitai tu sama magang dalam 1 Malaysia. Simoi Peri Kaban Kunsil Nengeri (ADUN) Lingga

SELAMAT HARI GAWAI: Simoi (tengah) enggau Brandah (tiga kiba), Kunjang (dua kiba), Lansing (tiga kanan) sereta bala bukai b enung melah kek Gawai maya program nya ensanus.

BEGAWAI: Simoi (dua kiba) disempulang Brandah (kiba) benung meda bala indu ngajar ti ngelaluka penatai iya maya pengerami nya.