Pengerami Makai Lemai Mantar Gawai 2017 Siol Batu pelasar negapka kaul enggau pangan diri
KUCHING: Pengerami Makai Lemai Mantar Gawai 2017 ke diatur komuniti Dayak ti diau di Siol Batu di sebuah hotel ditu kena minggu nyin tadi, ukai semina dikearapka ulih ngedutka agi kaul entara komuniti nya ke nguan genturung pendiau nya,tang mega enggau komuniti etnik bukai ke diau besemak enggau gentrung pendiau sida.
Chairman Kelab Lumba Rekreasyen Genturung Pendiau Siol Batu, Rantai anak Bain madah siti ari pemerat ngatur Pengerami Makai Lemai Mantar Gawai nya, laban deka negapka agi kaul entara genturung pendiau sereta sekeda gerempung NGO ke bisi diatu, kelimpah ari ngumpul duit turu dikena mantu Kelab Lumba Rekreasyen Genturung Pendiau Siol Batu.
“Kami enda ulih ngatur pengerami ke baka tu di genturung pendiau kami empu laban bisi pengurang perengka guna baka nadai kanopi, kerusi, mija sereta belanja.
“Nya alai, kami ngarapka opis enggau ejensi perintah ulih mantu kami nengah pemeri duitturu, ngambika ulih sama ngemansangka Kelab Lumba enggau Rekreasiyen genturung pendiau kami,” ku Rantai madah lebuh bejaku ba pengerami nya.
Pengerami nya udah digulu urung 400 iku nyengkaum Senator Dr. Zaiedi Suhaili ti ngarika Menteri Muda Undang-undang, Kaul Perintah Nengeri enggau Perintah Besai sereta Projek, ti mega ADUN Semariang, Shari- fah Hasidah Sayeed Aman Ghazali sama bisi ngulu atur pengawa, lalu nyuaka geran nyengkaum Menteri Kereja Dato Sri Fadillah Yusuf sama bisi meri geran RM3,000 ngagai kelab nya ( diarika Sekretari Politik Kepala Menteri, Morshidi) ngagai pengari genturung pendiau nya.
Sama bisi enggau pengerami nya, Penghulu Philip Entawan, chairman SDNU pampang Kampung Siol Kandis, Pani Igoh, DSP Insi enggau raban iya ari Markas Indu Opis Pasukan Gerakan Am (PGA) Batu Kawa, pengari ari Genturung Pendiau Gita, Genturung Pendiau Cenderawasih, Genturung Pendiau Bandar Baru Semariang, enggau Genturung Pendiau Demak Laut.