Pampang Indu PBB ngelangkar strategi dikena napi PRK Pujut
MIRI: Pampang Indu Parti Pesaka Bumiputera Bersatu (PBB) diatu benung ngatur strategi ngulihka baru baru sitak Kunsil Bepilih Nengeri (DUN) Pujut ba Pengawa Bepilih Mit (PRK) ti deka diatur kena 4 Julai ke deka datai tu.
Sapit pampang nya, Datuk Fatimah Abdullah madahka parti nemu penuduk tu diempu penyakal lalu tebal agi pengundi ngarika sida, tang nya enda matahka pengeran pampang Indu PBB ti deka naka ulih bejalaika pengawa.
“Kitai nemu tu ukai pekara ti mudah deka menang di Pujut, tang kitai berandauka strategi ke pemadu manah dikena mantu bakih kitai ti deka bediri minta pilih.”
“Kitai deka nentuka tetiap raban pengawa bepilih parti ti pemadu manah manah lalu ngatur strategi pemadu manah. Berebak enggau nya, ngelala pengelemi ti patut dikemanahka,” ku iya madah ngagai pengarang berita maya Pengawa Betemu Enggau Indu PBB ari Piasau, Pujut, Lambir, Senadin sereta Bekenu di Hotel Dynasty, apin lama udah.
Pengawa tu nyadi sebagi ari pengawa nyediaka pampang Indu PBB napi PRK DUN Pujut ti deka dipejalaika berindik ari pengawa ningkilka penyandang sitak nya, Dr Ting Tiong Choon ke mega nyadi Kaban Kunsil Nengeri sitak nya kena 12 Mei tu tadi.
“Taja Pujut ukai PBB, tang kitai patut meri bantu ti patut sereta bebendar mantu ngemenangka barang sapa chalun,” ku iya.
Dulu agi ari nya, randau diatur dikena meri nama baru ngagai ‘Skuad Sayang’ nyadi ‘Skuad Kasih Sayang 6-17’ tauka SKS 6-17.
“Pengawa meri nama baru tu digaga pengudah berandau enggau Ketuai Indu PBB Tan Sri Empiang Jabu sereta udah dipesetuju Kepala Menteri Datuk Amar Abang Johari Tun Abang Openg.”
Ku Fatimah nambah, penambah 6-17 iya nya beserimbai enggau pengawa nyiri Abang Johari nyadi Kepala Menteri tke-6 lalu 17 nya mai reti taun tu.
SKS tu nyadi raban dikena ngaul rayat ti enda ngemeratka maya musim pengawa bepilih aja tang seruran gawa.
“Tu ukai bekaul enggau politik aja, tang meri servis ngagai rayat ti begunaka nya. Kitai deka ngenyemakka diri enggau sida lalu mendingka penanggul ditapi rayat ba renggat nembiak redak,” ku iya.
Sama bisi datai Menteri Muda Orang Indu, Ruang Bilik enggau Pemansang Anak Mit Rosey Yunus enggau Ketuai Indu PBB Lambir Kunsilor Zainani Salleh.