Isi pom di balai polis enti pulai ninggalka rumah
Ngambika raban polis ulih matau rumah ke ditinggal sekumbang sida pulai ke menua ngintu Hari Gawai
SERIAN: Mensia mayuh ti ninggalka rumah diri ngerami Hari Gawai di menua diperansang ngisi pom di balai polis ke besemak.
Ketuai Bagi Nyeliah Ulah Jai enggau Pengelikun Kontinjen Polis Sarawak SAC Shafie Ismail madah pekara nya beguna amat ngambika raban polis ulih matau rumah ke ditinggal.
‘Ba taun 2016, pemereti mensia mayuh sentang pekara tu chukup manah. Sida bepesan ngagai orang sepiak rumah sereta ngisi pom mindah di balai polis.
“Ba Ops Selamat 2016 penyampau kes beserungkai ke rumah nurun ngagai 48 kes enti dibandingka enggau 67 kes ba taun 2015,”ku iya.
Shafie mansutka jaku nya ba aum pengarang berita pengudah bejadi ‘Ops Selamat’ nyerumba Pengerami Gawai Dayak 2017 di Serian kemari.
Ops Selamat 2017 berengkah 26 Mei nyentuk 4 Jun 2017 di serata nengeri.
Shafie nambah, rikod mandangka sida ti ngisi pom, rumah sida enda diserungkai orang jai.
“Ba taun 2016, nadai seiti rumah ke bisi madahka diri mindah( ngisi pom) kena serungkai.
“Raban polis deka suah matau rumah sida ke alai aku bisi ngeluarka perintah ngambika rumah sida seruran dikemata,’ku iya.
Ngenang kaul ke sama, Shafiee madah polis mega deka matau lori ke diengkah ba tisi jalai rambau Ops Selamat 2017.
Ku iya, mayuh kes ngelan- tak belakang lori ke diengkah tisi jalai udah nyadi ke alai sekeda nya udah nabanka nyawa.
Sentang Ops Selamat 2017, iya madah operasyen diadu enggau tuju ngurangka kes bebadi di jalai alun.
“Ba musin pengerami, perengka pengangkut deka nedat jalai alun. Polis deka nentuka sida nitihka undang-undang jalai alun.
“Tebal agi penusah nyadi ketegal sekeda orang suah berumban. Kitai meseti anang berumban, penusah nyadi ukai ketegal jalai enda manah tang ketegal ulah ti berumban maya bebaika perengka pengangkut,’ku iya.
Bela datai Kaban Kunsil Nengeri(ADUN) Bukit Semuja John Ilus.
Ba taun 2016, pemereti mensia mayuh sentang pekara tu chukup manah. Sida bepesan ngagai orang sepiak rumah sereta ngisi pom mindah di balai polis. Shafie Ismail Ketuai Bagi Nyeliah Ulah Jai enggau Pengelikun Kontinjen Polis Sarawak