Tasat kes bunuh di Jalai Abang Abdul Rahim nyauka tembu

KUCHING: Tasat kes bunuh di Jalai Abang Abdul Rahim kena 22 Mei tu tadi diadang tembu pengudah senyata kerambit ke dikena saspek ditemu polis.

Ketuai Polis Pelilih Kuching, ACP Abang Ahmad Abang Julai madah, tujuh saspek nyengkaum seiku saspek ke munuh deka didawa di kort ba awak ke semak nengah Seksyen 302 Kanun Keseksaan.

“Tasat diatu nyauka tembu ke alai kitai pechaya semua saspek deka didawa enda lama agi,’ku iya lebuh dikerandau pengudah Gempuru Ninting Bulan Polis Diraja Malaysia (PDRM) Indu Opis Polis Pe- lilih (IPD) Kuching di Padang Kawad IPD ditu, kemari.

Ngenang sentang kes bunuh nya, Abang Ahmad madah kerambit nya ditemu tauka dilalai di langkau manuk saspek ke munuh kena 23 Mei urung jam 10.30 pagi.

“Senyata nya ditemu pengudah saspek empu madah ke endur iya nyelalai ke alai kitai mega bisi tetemuka sarung kaki ke mengkang bisi bekau darah ti dikena saspek mungkus kerambit,’ku iya.

Ku iya nambah, dua entukar ke bisi kaul enggau saspek bela dirampas ngambika nyadi bukti.

Ba penusah ke nyadi kena 22 Mei nya, orang ke parai ,38, ke kala gawa ba Dewan Bandaraya Kuching (DBKU) mati pengudah diinsah saspek enggau kaling iya, urung 300 meter penyauh ari sebengkah palan pemerindang.

Ketegal nya, tujuh iku nyengkaum dua iku orang indu ke beumur entara 25 nyentuk ngagai 68 taun ditangkap polis nyengkaum saspek ke munuh.

“Kitai pechaya ari asil ke ditemu, kes diputar dalam timpuh 48 jam. Kitai ngarap kes ke baka tu enda nyadi agi di Kuching,’ku iya.