SK ST Thomas Kuching udah mujur ngatur Pekit Merentas Desa ke taun 2017
KUCHING: Urung 184 iku nembiak Tahap 2 SK ST Thomas ngambi bagi ba pekit Belanda Merentas Desa Peringkat Sekolah 2017 nyerumba program 1Murid 1Sukan (1M1S), apin lama.
Nitih ku Kepala Pengajar SK St Thomas Jeferry Renos madah, pekit Merentas Desa nya sebengkah ari lumba ke diatur ninting taun sekula nya ke dipasuk semua nembiak.
Pekit ninting taun nya ungkup taun tu diatur pun bulan Mei tu tadi ba Taman Budaya ke diatur urung pukul 2 nyentuk 4 lemai.
“Merentas Desa iya nya program 1Murid 1Sukan (1M1S) ke enda tau enda diatur ba sekula.
“Taun tu pekit Belanda Merentas Desa semina dibuka ngagai nembiak ba Tahap 2 iya nya Primari 4,5 enggau 6.
“Urung 184 iku nembiak ti ngambi bagi dalam pelanda rentas desa tu ari penyampau semua 197 enrolmen Tahap 2. Reti nya bisi 93.4 peratus pesereta nembiak Tahap 2,” ku iya madah ngagai Utusan Borneo.
Pekit Merentas Desa tu diatur bepelasarka beberapa batang objektif baka dikena napi peminta tusun atur sekula ngatur pekit merentas desa nyadi pekit ninting taun.
Objektif kedua, dikena nempa pengeregas fizikal enggau runding nengah aktiviti lumba enggau main awakka ulih nempa individu ke regas.
Nambahka nya objektif pekit merentas desa dikena ngiga tauka milih pengari sekula bepekit ba renggat pelilih menua ninting taun.
Perais ke ungkup pesereta ti teulihka lumur satu, dua enggau tiga iya nya trofi enggau setipikit ke tetiap kategori (Primari 4, 5 enggau 6).
Lalu lumur empat ngagai 10 deka nerima perais midul enggau setipikit.