RFF deka diatur berengkah 7 nyentuk 16 Julai 2017

KUCHING: Rainforest Fringe Festival (RFF) deka diatur berengkah 7 ngagai 16 Julai 2017, ditu.

Menteri Dagang Temuai, Seni Main Asal, Nembiak enggau Lumba enggau Main, Datuk Abdul Karim Rahman Hamzah madahka, RFF nya pengemun pengerami besai Rainforest World Music Festival (RWMF) ke diatur kena 14 ngagai 16 Julai tu ba Kampung Budaya Sarawak.

Iya madahka RFF nya seiti ari program nyerumba RWMF kelimpah ari sekeda program bukai ke diatur ba Kampung Budaya Sarawak

“Nyerumba kali ke- 20 RWFM udah diatur, pengatur (RWMF) taun tu bisi ngatur program baru tauka bebida ari taun ke udah, ti ulih dikearapka ngangkatka RWMF iya nya Rainforest Fringe Festival (RFF) ke diatur 7-16 Julai, di mengeri Kuching,

“Festival (RFF) tu deka ditaur ba Kort Lama, Kompleks Dagang Temuai Sarawak; Hotel Telang Usan; The Hotel Waterfront enggau Kuching Amphitheatre.

“Ngagai temuai ke datai ari luar menua Kuching baka temuai ari menua Singapura, Indonesia enggau menua tasik ke bukai sereta ke diau di luar mengeri Kuching tang agi dalam Borneo endang sama bela diperansang ngulu festival tu,” ku iya.

Karim mansutka pekara nya dalam aum pengarang berita RWMF ke diatur ba bilik baum opis menteri nya ba Tingkat 2, Begunan Baitulmakmur ditu, kemari.

Entara program ke diatur ba RFF nya ila baka Sada Kamek: Music of Sarawak ba Kuching Amphitheatre ti ngayanka beberapa iku peranak menua tu ke bepenau sereta bepengelandik ba muzik enggau kereban muzik asal enggau moden baka Tony Eusoff, Mathew Ngau, At Adau, Alena Murang, Dayang Nurfaizah, Pete Kallang, Nading Rhapspody enggau Noh Salleh.

Nambahka nya pengawa pemandang mega bisi diatur baka Pemandang Seni, Pemandang Fotografi kelimpah ari Screening-Documentaries, Craft and Vintage Market, Talk: Alfred Wallace, Talk: Charles Hose, Screening - Rainforest Films enggau Talk: The Healing Forest, lalu semua tu diatur ba Kort Lama, Kompleks Dagang Temuai Sarawak.

RFF mega bisi ngatur ‘Forgotten Sounds’ ba Telang Usan Hotel enggau Fashion Gala - Sarawak: Theattre of Clothes ba The Waterfront Hotel.

RFF diatur Opis Menteri Dagang Temuai, Seni, Main Asal, Nembiak enggau Lumba enggau Main nengah kerejasama Opis Dagang Temuai Sarawak enggau RWMF.

Mensia mayuh ulih tama enda bebayar ngagai semua program ke diatur RFF nya.

Berebak enggau tu lebuh ke ngenang pasal RWMF, Karim madahka sida nagit penatai 20,000 iku mensia berindik ari taun 2016 bisi urung 18,000 iku temuai ari menua tasik enggau menua tu empu bisi datai ngagai RWMF.

Sama bisi dalam aum pengarang berita nya kemari, Menteri Muda Dagang Temuai, Seni enggau Main Asal Datuk Lee Kim Shin, Mendam Sekretari opis menteri nya Datu Ik Pahon enggau kebukai.