Asil industri kayu bisi kurang suku keterubah taun tu
Tu ketegal ekonomi dunya ti enda manah diatu lalu meri empas ba penyampau ekspot enggau produk ari asil kayu
KUCHING: Asil ari industri kayu nengeri ungkup suku keterubah taun tu semina ba ikas RM1.42 bilion , Ku Sapit Kepala Menteri Datuk Amar Awang Tengah Ali Hassan.
Iya ke mega Menteri Pemansang Industri enggau Dagang madah, pengurang nya ketegal empas ekonomi dunya ti enda manah maya ke diatu.
“Industri kayu kitai napi pemar ketegal makit dunya ke enda manah kelebih agi makit menua Jepun, Korea enggau China.
“Ekonomi dunya ke enda manah meri empas ba penyampau ekspot kayu enggau produk ari asil kayu kitai,’ku iya.
Awang Tengah mansutka jaku nya ba pengerami nyuaka pemeri ninting taun Perbadanan Kemajuan Perusahaan Kayu Sarawak (PUSAKA) ke diatur di Dewan Seminar PUSAKA, Wisma Sumber Alam ditu, kemari.
Tajapia ku iya, perintah deka chakah agi ngelaku industri kayu laban nya ti nyadi pun penatai pemisi nengeri ke pemadu besai.
Penatai pemisi ari industri kayu ku iya dikena ngemansang Sarawak ungkup pemaik rayat.
“Pekara ke berat ba industri kayu iya nya kitai meseti ngangkatka operasyen, pekara pansik enggau pemansang ( R& D) sereta nguna teknologi baru ngambi ulih besemekih enggau menua bukai,’ku iya.
Ngenang kaul ke sama,
Industri kayu kitai napi pemar ketegal makit dunya ke enda manah kelebih agi makit menua Jepun, Korea enggau China. Datuk Amar Awang Tengah Ali Hassan Sapit Kepala Menteri Sarawak
iya madah industri meseti diangkat ngagai ikas ke tinggi agi ngambi ulih nyatup pengerembai industri ke sama ari menua China.
Ku iya ke mega Menteri Pemansang Kandang Mengeri enggau Pengeraja Asal II, China ulih nyual papan lapis nengah rega ke mudah.
“Tajapia, produk ari asil kayu kitai mengkang ngembuan kualiti ke manah sereta dikerindu.
‘Kitai deka majakka pengawa ngelaku industri kayu kelebih agi nengah Sarawak Timber Expo ba taun tu,’ku iya.
Nengah expo 2017 pengelama tiga hari berunggu, kitai bulih asil jual penyampau RM147.8 juta, tandu iya.
Nitihka surat penerang ari PUSAKA, penyampau ekspot produk kayu ungkup lima bu- lan keterubah taun tu kurang lapan peratus enti dibanding enggau taun 2016.
Ungkup timpuh bulan Januari nyentuk ngagai Mei 2017 penyampau ekspot RM2,404 juta ke alai ungkup timpuh ke sama ba taun 2016, penyampau ekspot manggai RM2,627 juta.
Ba pengerami kemari, 59 bengkah gerempung pengintu pengelantang pendiau sereta Gerempung Ukai Dikuasa Perintah(NGO) nerima bantu ari PUSAKA sepenyampau RM266,000.
Bela datai Menteri Muda Jalai Tebing Tasik Datuk Julaihi Narawi, Menteri Muda Pekara Korporat Abdullah Saidol enggau Manijar Besai PUSAKA Datu Sarudu Hoklai. KUCHING: Sekolah Kebangsaan (SK) Sg Arang di Baram entara sekula ke udah tuai sereta kurang nembiak ti deka dikemeratka dulu digaga baru ngena chara baru baka ke dipadahka Kepala Menteri.
Menteri Muda Pelajar enggau Pemansik Teknologi, Dr Annuar Rapa’ee madahka sekula nya kategori sekula tuai 3 (DS3) ke ukai semina udah tuai ba struktur tang mega udah lebih 50 taun.
“Penanggul sekula tuai ukai pekara baru ba kitai di Sarawak lalu kitai udah bisi perambu ke lebih engkeman dikena mutarka isu tu iya nya, ngaga baru sekula tuai ngena duit perintah nengeri empu.
“Kitai ukai semina deka ngemanah tang kitai deka ngereja ti lebih manah agi ungkup semua sekula di nengeri tu nyengkaum SK Sg Arang, Baram,” ku iya ba aum pengarang berita di Wisma Sultan tengah ditu, kemari.
Bepelasarka ripot berita besai pasal SK Sg Arang ba surat kabar menua tu ensanus, Dr. Annuar madahka Opis Pelajar Pelilih Menua (PPD) Baram kala merambu ngambika sekula tu dipindahka ngagai palan baru sebedau isu nya dibantaika.
Ku iya, ba taun 2011, Opis Pelajar Nengeri udah ngaga tiga buah rumah pengajar bansa ‘kabin’ ke beungkus RM732,000 enggau sebuah bilik kelas sereta perengka guna kebukai ke ungkus belanja RM704,000.
Ba taun 2014 mega ku iya, bisi sepenyampau RM30,000 udah dipelanja dikena ngemanahka rumah pengajar ke alai ari lapan rumah pengajar nya, lima udah manah tang semina tiga aja agi ke lama.
“Kena 11 enggau 12 Julai tu, kami deka ngatur bengkel ti berandauka pasal isu sekula tuai enggau kurang nembiak di nengeri tu.
“Maya bengkel nya ila, kitai deka ngelala bagi 100 sekula ke deka dikemeratka dulu ke patut digaga baru sereta dichampurka ngena belanja perintah nengeri empu baka ke udah dipesetuju Menteri Besai.
“SK Sg Arang engka sebuah ari 100 buah sekula ke dikemeratka dulu lalu enti bisi pematut kitai deka nyampurka enggau sekula bukai nyadi sebuah sekula ke disikap enggau semua kereban,” ku iya.
SK Sg Arang, Baram digaga dalam taun 1962 lalu semina ulih disambung nengah jalai sungai ari Pasar Marudi, ngena bot pengelama sejam.
Sekula tu bisi 53 iku nembiak iya nya sekula kurang nembiak (kurang ari 150 iku nembiak), 14 iku pengajar enggau lapan staf bukai.
Bekaul enggau penyulut, sekula nya ulih ngemuaska ati sereta ngerikod Gred Purata Sekolah (GPS) entara 2.8 ngagai 3.29 ari taun 2012 ngagai 2015.
Sekula tu agi ngena generator sereta bepanggai ba ai ke ditekat ke nyadi bekal ai.
Ngenang isu baya ke suah tama ngagai kandang sekula nya, Sarawak Forestry Corporation ( SFC) deka nganjung raban ti nangkap enggau munaska baya nya kena ujung minggu.
Kelimpah ari nya, SFC mega dipinta ngaga rekomedasi chara nagang dikena ngenukuka pengelikun nembiak enggau peranak sekula ke bukai nyengkaum peranak ba kandang menua ke ngelingi nya.
Sama bisi datai ba aum pengarang berita nya kemari, Sekretari Mendam Opis Menteri Pelajar, Sains enggau pemansik Teknologi, Datu Sudarsono Osman, Sapit Direktor Pelajar Sarawak, Abang Mat Ali enggau Ketuai Sektor Servis Nurun Pengawa, Ngaduka Pengawa enggau Pemansang Opis Pelajar Nengeri, Wan Fadillah.