Urung 79 iku pesakit nerima pemeri ari SME Bank Bintulu
BINTULU: Beserimbai enggau nyambut bulan Ramadan Al-Mubarak, SME Bank Pampang Bintulu terus bejalaika tanggungpengawa sida ngagai mensia mayuh ditu nengah program nemuai ngagai Wad Pediatrik Sepital Bintulu merindang bala nembiak ba wad nya seraya bejalaika tanggungpengawa rama korporat (CSR) bank nya, kemari. Ketuai Pampang SME Bank Bintulu, Hamizah Jamhari madah, program CSR ke dipejalai nya endang program ninting taun diatur beserimbai enggau bulan Ramadan.
Kenu ku iya, nyerumba Ramadan meda, piak sida bisi dikangau nyuaka ban- tu ngagai nembiak kurang benasip lalu ngarapka pengawa nya ulih meri sida pengaga ati.
“Rambau penatai nya kami bisi mai perais gelembung dikena merindang sida taja betapi enggau pemedis lalu nya dikearapka meri sida peransang ngambika kering ngelaban pemedis nyengkaum ba orang ke ngibun sida,” ku iya madah ditu, kemari.
Iya madah, urung 79 iku nerima agih belanja ke dipejalai nengah program berambaika jaku ‘Hand in Hand’ ba bulan Ramadan tu.
Program penemuai nya mega disempulang Matron Grenlya Nyanggai sereta bala misi ke gawa ba wad nya.
“Agi bisi dua bengkah aktiviti nengah program CSR Ramadan deka dipejalaika SME Bank.
“Entara nya meri bantu ngagai raban asnaf kena 17 Jun tu ba Kampung Kuala Segan ke mungkur barang pemakai, barang guna ninting hari enggau duit raya ungkup 12 ruang bilik seranta ke udah dikelala,” ku iya.
Kelimpah nya, ku iya SME Bank mega bisi ngerami bala anak patut balu nengah pengawa melika sida baju raya enggau duit raya ba Kompleks Kebajikan Anak- Anak Yatim (PERYATIM) Kampung Jepak kena 20 Jun (Hari Dua tu.