Urung 100 iku raban kurang benasit nerima bantu ari MAKSAK Bintulu
BINTULU: Urung 100 penerima nyengkaum indai tunggal, raban seranta enggai sida ke enda bidik lansik bisi nerima pemeri ari Kaunsil Pengintu Pengelantang Pendiau sereta Lumba Staf Perintah (MAKSAK) Bintulu bepalan ba Laman Opis Bintulu, Wisma Residen ditu.
Pengawa nyuaka pemeri ari Program ‘Jalinan Kasih Ramadan’ nyadi mujur dipenyadika Residen Bintulu ke mega Chairman MAKSAK Bintulu, Muhamad Yakup Kari.
Program nya diatur MAKSAK Bintulu, MAKSAK Indu Bintulu enggau Badan Kebajikan Islam (BKI) Opis Pengatur Pengawa Bintulu ke bela digulu Pemantu Menijar Besai (Bagi Rampa Menua) Kaunsil Pemansang Bintulu (BDA), Wan Ibrahim Wan Ali; Temenggong Abang Suhaili Abang Mohamad; Temenggung Barry Yek; Pemancha Rosli Kamaruddin; Pemancha Datuk Francis Toh; bala ketuai opis perintah enggau ketuai raban bansa besemak.
Pengari komiti pengatur madah, pemeri nya mandangka penyiru enggau deka mantu ari raban staf perintah, sektor swasta enggau serikat ngati kediri ungkup raban ke tusah.
Kelimpah nya, ku iya dikena mantu ngelempungka tating penusah raban ke ngintu Hari Raya Aidilfitri enda lama agi, pengawa nya mega dikena nempa ulah ke manah dalam mantu orang tusah enda ngira bansa enggau pengarap.
Pemeri ke disuaka nya nyengkaum berau, ai irup dalam tin enggau barang pemakai ari mayuh gerempung sereta kelab ejensi opis perintah, gerempung ukai perintah (NGO) sereta Farley Supermarket (Bintulu) ditu.
Bala ke bisi nerima bantu tu dikelala nengah sistem e-kasih lalu staf perintah ke begaji mit datai ari mayuh bansa enggau pengarap.