Bejimat ngena perengka elekterik, anang bemain merchun, ku Nor Hisham
SIBU: Rambau ngintu Hari Raya Aidilfitri tu, raban Islam ditangkan ngambika bejimatjimat maya ngena perengka elektrik sereta anang bemain merchun tauka bungai api.
Direktor Opis Bomba enggau Penyah Penusah Malaysia ( JBPM) Nengeri Sarawak Nor Hisham Mohammad madah, ulah ilap ulih ngujungka penusah enda disadang nyadi.
“Sama- sama mih kitai ngingatka pangan diri. Maya ba rumah anang sesekali nguji ninggalka utai disumai kita ba dapur. Pia mega anang kelalu mayuh nguna plak ba rmah laban nya ulih ngujungka karan sut.
Kelimpah nya, jaga anak kitai ngambika enda bemain merchun enggau bungai api. Anang ketegal pengerami tu kitai labuh ai mata. Patut bejimat ba sebarang pengawa ke digaga lebih agi maya deka nyendiaka diri ngerami Hari Raya Aidilfitri ini,” ku iya.
Nor Hisham madah munyi nya ngagai pemberita pengudah Pengerami ‘Jalinan Mesra Ramadan’ Renggat JBPM Nengeri Sarawak ke diatur ba Balai Bomba enggau Penyah Penusah Sibu, Jalai Central ditu, malam kemari.
Bela bisi datai iya nya Pe- mantu Direktor Operasyen JBPM Nengeri Sarawak Tiong Ling Hiee, pengari Ketuai JBPM Zon 4 Sarawak Wan Kamarudin Wan Ahmed, Ketuai Balai Bomba enggau Penyah Penusah Sibu Abdul Mutalib Jaafar enggau Pemantu Menijar Kaunsil Pengintu Pengelantang Pendiau Anak Patu Balu Sarawak Sibu Siti Aminah Abdullah.
Ba pengerami nya, JBPM bisi nyuaka pemeri urung RM2,000 ngagai Kaunsil Pengintu Pengelantang Pendiau Anak Patu Balu Sarawak Sibu sereta pemeri barang pemakai ngagai anak patut balu.
Lebih 50 iku anak patut balu ke ngulu pengerami nya nerima duit Raya ari Nor Hisham.
Dulu ari nya, Nor Hisham sereta temuai bukai ke bisi datai makai begulai sereta bejalaika pengawa sembiang.
Nor Hisyam mega nangkan kunchi rumah patut diengkah ba palan ke ditemu semua diri sebilik.
Tu beguna amay ku iya, ngambika semua diri sebilik nemu enti bisi penusah enda disadang.
“Anang naruh kunchi ba endur sengapa. Taruh mih ba palan ke likun sereta muntang dijengkau. Beguna amat, padah ngagai semua diri sebilik ngambi nemu dini kunchi nya ditaruh,” ku tandu iya.
Berebak enggau nya, iya mega nangkan bala penguna jalai raya patut bejimat lebuh mulaika diri ngagai menua.
“Nengah kemisi panjai sereta awak ke chukup, perambu manah pejalai kita.
“Enti kita ngembuan awak ke chukup sereta merambu pejalai enggau manah, tentu kita lebih bejimat,” ku iya.
Nor Hisham mega ngarapka nadai penusah bebadi besai nyadi rambau musim pengerami tu lalu besambi ngarapka semua orang selamat datai ba palan ke dituju.