Chukai dagang temuai patut dibantah, nangi majak nating pengidup rayat

MIRI: Atur bejalaika chukai dagang temuai seiti agi kuasa baru perintah besai ngachau hak rayat Sarawak ke patut dibantah perintah nengeri.

Chairman Parti Tindakan Demokratik (DAP) Sarawak, Chong Chieng Jen ngansak perintah nengeri mantah atur bejalaika chukai nya ke deka berengkah 1 Julai tu laban dikenangi majak nating pengidup rayat.

Kelimpah nya, iya mega besemaka chukai dagang temuai sebaka enggau chukai barang enggau servis (GST).

“Chukai dagang temuai endang sebaka enggau GST. Nya bisi chukai servis ungkup bala penguna. Nya alai, kami minta perintah nengeri meseti mantah chukai tu baka digaga ngagai GST sebedau tu, “ku terang iya nyemetak.

Chong madah, bantah ari perintah deka mandangka penyiru ngagai pengelantang pendiau enggau hak rayat.

GST bepun dipejalai 1 April 2015 nengah tikas standard 6 peratus pengudah ngemaduka Chukai Barang (10%) enggau Chukai Servis (6%).

“GST meri pangka besai enda manah ngagai ekonomi. Pengudah dipejalai, semua rayat ngasaika penusah,” ku iya.

Ba aum Parlimen apin lama ke udah, Rang Undang-Undang Chukai Dagang Temuai 2017 dikemendar iya nya ngemendarka atur bejalaika chukai entara RM2.50 ngagai RM20 ungkup chaj bemalam ba hotel enggau rumah ke berejista.

Menteri Dagang Temuai enggau Main Asal, Datuk Seri Mohamed Nazri Abdul Aziz madah, perintah deka ngena asil chukai dagang temuai ngelakuka Malaysia ba menua luar sereta ngemanah agi perengkaguna dagang temuai.

Bekau ari pekara nya, perintah nengeri Sarawak ngaga pemutus ningkilka diri nyadi kaban Kaunsil Dagang Temuai Malaysia.

Kenu ku Perintah Nengeri tanggungpengawa nya nadai guna laban sebaka enggau tanggungpengawa ba Kaunsil Ngelaku Dagang Temuai Sarawak.