Pengawa sembiangka injin bot baru udah dikemujur kena Lemai Hari Dua tu tadi

KAPIT: Pengawa sembiangka injin bot baru dikena mai bangkai udah diatur di Palan Servis Parti Rakyat Sarawak (PRS) BN Pelagus ditu, kena lemai Hari Dua tu tadi.

Sembiang tu diuluka Pastor Banggau ari Gerija Methodist Iban ditu.

Bisi datai Kaban Kunsil Nengeri (ADUN) Pelagus Wilson Nyabong Ijang, Kunsilor Bakat Gira enggau Kunsilor Jantai Maseng, Penghulu Daniel Dian enggau bala kaban Raban Nembiak enggau Biro Indu PRS Pelagus ditu.

Nyabong madah ngagai pengarang berita injin 40 HP berega RM11,000, pemeri begulai Sapit Kepala Menteri Sarawak Tan Sri Datuk Amar Dr James Jemut Masing ke mega ADUN Baleh enggau iya empu, ADUN Pelagus.

Iya nerang, perau panjai udah dikeluar dalam pun bulan Mac 2017 lalu diatu injin sepit ungkup sida ti begunaka bantu di Kapit enggau pelilih Bukit Mabong.

Iya nikalka kenang lebuh bejadika perau panjai ungkup pengawa pengasih ke diatur di Rumah Minggat, Nanga Bawai A, Sungai Baleh ditu.

“Beratika mayuh peranak kitai ke gawa di menua luar di Singapore, Semenanjung Malaysia, Brunei, Kuching, Sibu, Bintulu enggau Miri. Maya bisi orang parai luar ari Kapit, sida niang sebilik enggau kaban belayan iya betapi enggau pemar mai bangkai pulai ke Kapit ngambika disengai sereta ditumbak.

“Bala sida suah minta sereta ngapil ngagai Opis Polis Kapit enggau Opis Bomba enggau Penyah Penusah mantu sida ngena perau panjai nganjung larung pulai ke Kapit, ngagai rumah panjai sida,” ku Nyabong.

“Bisi maya napi pemar nginjau perau panjai ari opis perintah, nya alai aku mutuska ngaga perau panjai ungkup pengawa tu dikena mutarka peminta sida.

“Perau panjai tu diban sereta digaga peranak ari Rumah Minggat disikap ngena injin sepit 30 HP ti ulih ngundan 20 iku orang penumpang sebarang maya ti mai bangkai. Tu pemeri aku ngagai peranak di Pelagus ti udah ngundi aku maya pengawa bepilih besai suba.

“Nya alai, aku ngarapka berengkah ari diatu, sida enda betapi sebarang penanggul perengka pengangkut laban aku udah nyediaka perengka pengangkut ngagai sida ti begunaka nya,” ku Nyabong nambah.

Tuai Rumah Minggat dipadu megai pengawa ba pekara bot tu.

BESAMPI: Sekeda ari bala ke bisi ngulu sembiang ke diatur ba Palan Servis PRS BN ti sembiangka injin sepit ungkup pengawa pengasih.

MINTA BEREKAT: Pastor Banggau (bediri, enam kiba) nguluka sembiang ke diatur ba Palan Servis PRS BN Pelagus sembiangka injin sepit ungkup pengawa pengasih.Bediri ari kiba, Penghulu Daniel Dian. Duduk (empat, lima enggau enam) Kunsilor Bakat Gira,...