Ex ADUN Marudi Entri, nyida dianu Penguang

Ketegal Entri enda tetembuka projek ngaga Jalai Miri-Marudi sekumbang iya ke agi nyadi ADUN suba

KUCHING: Ex-Kaban Kunsil Nengeri Marudi,Datuk Sylvester Entri Muran ringat enggau penyandang sitak nya ke diatu Datu Dr Penguang Manggil ti nganu iya ketegal Jalai Miri-Marudi ke panjai 44 Km rusak.

Entri madah, Penguang enda patut nganu iya ketegal enda ulih nembuka jalai nya jampat laban nya mega sama baka iya nganu perintah, tambah mega seduai ari sepiak ke sama.

Penguang ke mega Kaban Parti Demokratik Progresif (PDP) dikerandau The Borneo Post bedau lama udah bekaul enggau pengelubah pengawa nembuka jalai nya, minta pengarang berita nanyaka pekara nya ngagai Entri.

Ensanus Entri bisi datai lalu mansutka penerang bekaul enggau pekara nya.

Entri ke mega Sekretari Besai Parti Tenaga Rakyat Sarawak ( Teras) madah, maya iya nyadi penyukung Barisan Nasional (BN) ari taun 1996 nyentuk 2004 sereta mega nyadi menteri muda ari taun 2004 nyentuk 2016,iya nguji ngena belanja urung RM143.4 milion ari ungkup belanja ke diberi perintah besai dikena ngemanahka jalai kompeni kayu batang ari Miri-Marudi nyadi jalai alun ungkup mensia mayuh dalam taun 2016.

“Jalai kayu batang nya diambi JKR ke deka digaga nengah projek konsep Jiwa Murni soldadu dalam taun 2016.”

Taja pia ku Opis Kereja Raya (JKR) ungkus ke deka diguna perintah melakin nya magang manggai RM260 milion lalu dipelabaka mega deka begunaka belanja lebih laban ungkus perengka dikena udah majak mar, ku iya.

“Enti bisi orang deka beratika ripot rasmi nya,lebuh nyadi pengari penyukung BN aku bisi nanya pasal ungkup belanja ke jalai nya, tang status projek nya enda dikemeratka dulu. Udah aku mai beberapa iku bala pemesai ke bepelandik meresa jalai, nya baru jalai nya dikemeratka. Nya alai RM66 milion keterubah ari perintah besai udah dikemendarka. Menteri Besai empu ti ngemendarka nya dalam taun 2011.

“Taja pia, agi mayuh ti deka diguna.Nya alai perintah besai ngemendarka baru belanja RM77.4 milion. Semua penyampau nya urung RM143.4 million tang penyampau nya mengkang kurang urung RM260 milion tauka lebih ari nya ke bendar,” ku iya.

“Nya alai lebuh Penguang nganu aku ba pekara ti ngelui ari kuasa aku, iya mega nganu Menteri Besai enggau Perintah BN,” ku Entri.

Ku Entri, Penguang nadai kala minta “sesen pan” ke jalai nya tang iya semina bejalaika pengawa meresa jalai aja maya nya.

Lebuh ditanya nama kebuah ba sekeda jalai ti ditampal tauka dikemanah nya mengkang jai taja pan bisi sebagi ari belanja diungkup kena ngemanah,ku Entri laban jalai endang bedau tembu endar.

“Jalai nya mengkang betiku. Tepulai ngagai p erintah magi duit enggau manah nitihka pemansang kereja ngambika jalai nya ulih ditembu manah magang. Peminta ke belanja nadai dalam perambu peminta aku. Nya alai anang sengapa nganu aku,” ku iya mesan ngagai Penguang.

Taja pia, iya meri terima kasih ngagai soldadu Malaysi laban udah bebendar mantu ngaga jalai nya taun siti nyin tadi.

“Enti nadai projek Jiwa Murni soldadu, nadai mih jalai Miri-Marudi. Nya alai, terima kasih ngagai Menteri Besai ti udah ngemendarka projek nya. (Ngagai sesapa) ti deka nganu Projek Jiwa Murni nya sama reti nganu Menteri Besai enggau BN, laban pemansut belanja nya ari perintah BN government enggau Menteri Besai,” ku Entri nyemetak madah ngagai Penguang.

“Enti aku baka Penguang, aku deka minta perintah fokus ngagai pengawa ngaga Jalai Marudi-Long Lama ke sepenyauh 45 KM sereta minta raban Pan Borneo Highway ngerembaika projeck nya ke Marudi. Nya tau dikumbai jalai Pan Borneo Highway ke Marudi,” ku Entri.

Iya mega madah, semua orang ti nengah jalai deka meraka Sungai Baram ke besai nya ngena feri river sereta mega meraka Sungai Arang nengah jematan siti alur aja.

Entri madah munyi nya ensanus dalam pejalai ke ngulu pengawa rasmi komuniti beserimbai enggau bulan Ramadan.

Nya alai lebuh Penguang nganu aku ba pekara ti ngelui ari kuasa aku, iya mega nganu Menteri Besai enggau Perintah BN. Sylvester Entri Muran Ex-Kaban Kunsil Nengeri Marudi