SACCI lantang ati penyerekang penemu bekaul isu chukai dagang temuai mujur diputarka
KUCHING: Dewan Dagang India Sarawak (SACCI) berasai lantang ati pengudah penyarut ke nyadi, bekaul enggau chukai dagang temuai entara ketuai Barisan Nasional (BN) Sarawak enggau Menteri Dagang Temuai, Seni enggau Main Asal, Datuk Seri Nazri Aziz, diatu mujur diputarka.
Presiden SACCI Rajah Murugaiah madah penanggul nya mujur diputar berindik ari aum entara Menteri Besai, Datuk Seri Mohd Najib Tun Razak enggau Kepala Menteri Datuk Amar Abang Johari Tun Openg bedau lama tu tadi.
“Kami dipadah penanggul nya mujur diputarka berindik ari aum entara Menteri Besai enggau Kepala Menteri Datuk Amar Abang Johari Tun Openg.
“Terima kasih laban pekara nya udah mujur diputarka enggau chara ti manah,” ku Rajah.
Kena Hari Minggu nyin tadi, Nazri nganu Abdul Karim ketegal ngapil ngagai Putrajaya minta ngelanjarka dulu atur neritka chukai dagang temuai nya di Sarawak, laban ku Abdul Karim, atur nya enda setipak enggau Sempekat Malaysia 1963 (MA 1963).
Chukai nya deka dichaj RM20 ungkup sebuah bilik semalam ba temuai ti diau di hotel lima bintang, Entara RM10 ngagai RM15 semalam ba hotel 4 Bintang; RM5 semalam ba hotel 3 Bintang, lalu RM2.50 ba hotel 2 Bintang enggau 1 Bintang nyengkaum hotel/ motel mit Orkid tauka bilik nadai bintang.
Rajah madah baru, semua penanggul nya mujur diputarka laban bisi pemereti ati ba bala ketuai BN, ti ngujungka penanggul nya ulih diputar enggau lengkas.
“Ke udah nya di, udah mih nya. Kitai tu nyau tuai runding, lalu penanggul ke nyadi, enda ibuh dikeingatka lalu entara sida pan tau majakka pengawa sida iya.
“Ngarapka semua kitai, nyengkaum penyakal, enda ibuh agi meh nyebut tauka ngingatka pekara tu,” ku iya.
Sebedau tu Sapit Menteri Besai, Datuk Seri Ahmad Zahid Hamidi madahka pekara nya bisi dipejuraika dalam aum kabinet kemari, lalu pemutus pan udah digaga.
Taja pia, Ahmad Zahid nadai nyebut pasal gaya pemutus nya.
Rajah madah, SACCI ngarapka Putrajaya enggau menteri kabinet Perintah Besai bejejimat mimit lebuh bejaku pasal pekara ke sensitif di Sarawak, ku iya.