Long San palan ke engkeman endur ngidupka ‘sape’ enggau main asal enggau komuniti Orang Ulu
BARAM: Dikelala pun penatai asal seni, kraf, muzik enggau tanda komuniti Kenyah, Long San di ulu Baram engkeman endar nyadi palan endur ngintu sereta ngidupka baru ‘Sape’, kereban enggau muzik peranak asal nyengkaum main asal enggau pesaka asal komuniti Orang Ulu.
Merambu keretas kereja Kaban Kunsil Nengeri (ADUN) Telang Usan, Dennis Ngau rambau nutup Pekit Sape, Pesaka Asal enggau Main Asal Telang Usan bedau lama udah, madahka Sape tu tau nyempulang mayuh main asal enggau pesaka ti punas di dunya bukai nyema nadai pengawa ngintu enggau ngenan dipejalaika raban nembiak rebak baru.
Pekit tu sebagi ari projek Pesaka Asal Sape Telang Usan, ke nyadi projek Tanggungpengawa Rama Korporat (SCR) Sarawak Energy Bhd (SEB) bekerejasama enggau Komiti Pemansang Enggau Pengelikun Genturung Pendiau (JKKK) Long San.
Bisi 20 iku nembiak sekula sekondari ari Long San enggau genturung pendiau sereta rumah panjai besemak ngambi bagi dalam program pengelama 72 minggu ari baruh kemata dua iku orang ti landik nebah Sape, Alex Apoi enggau Mathius Irang.
“Tu sekeda ari kelai kitai ti mida kitai enggau orang bukai. Taja bisi sekeda sebaka dalam sekeda pekara, tang tetiap bansa enggau etnik bisi penyelai tempa sida empu. Sinu endar nyema rebak dudi belajar sereta nemu main asal enggau pesaka asal nengah rikoding audio- visual, bup sejarah, muzium enggau arkib.”
Nyebut pemesai guna nyaga, ngintu enggau ngidupka baru main asal enggau pesaka asal, ku Dennis, iya begunaka komitmen, pengeran, sukung enggau kerejasama ari semua orang lalu ukai semina raban tauka bansa ti bekaul aja. Semua orang enda tau enda begempung sereta gawa begulai kena nyapai juluk.”
Dennis mega muji inisiatif projek enggau program SCR ke bukai dipejalai Sarawak Energy di kandang menua nya.
Sama bisi datai Sekretari Politik Kepala Menteri Charles Balang Seling, Ketuai CSR Sarawak Energy Jiwari Abdullah sereta Ketuai Komuniti Long San Lucia Paya.
Berebak enggau nya, Jiwari madahka sida ngarapka penegap ba program tu sereta projek ke sama ditampung ngagai rumah panjai enggau genturung pendiau ke bukai di Baram enggau ke bukai.
“Sida bepanggai ba timbal ari peranak menua nya sereta pemisi orang ti landik ba muzik peranak asal di kandang menua nya.”
Ku Jiwari, nyadi insentif enggau peransang ngagai bala nembiak sekula ke bukai dalam projek nya, pengajar sape deka nyukung sida ti bisi penau sereta bala nembiak sekula nyempulang tiga iku pemenang tiga penuduk pemadu atas Festival Muzik Kampung Ujan Borneo di Kuching, ke alai sida tu deka bekunsika penemu, peneleba enggau pengelandik dalam Sape begulai enggau pemuzik asal nengah workshop.