Polis deka nasat kes Papagomo: Mazlan

KUCHING: Sepenyampau 32 iti ripot polis udah digaga minggu siti nyin tadi di serata menua tu ngagai siku blogger ke tebilang, iya nya Papagomo tauka Wan Muhammad Azri Wan Deris bekaul enggau penerang ti tau ngasuh begedika orang ti digaga iya.

Kepala polis,Datuk Mazlan Mansor madahka 15 iti ripot polis nya digaga di balai polis di nengeri tu lalu ke laluh nya digaga di Semenanjung Malaysia.

“Kami udah muka keretas tasat bekaul enggau ripot polis nya. Sebedau nya meri kami (polis) timpuh nembuka tasat dulu,’ ku iya madah ngagai pengarang berita pengudah bebuka puasa enggau bala polis pelilih menua kena malam Hari Empat tu tadi.

Iya ngakun, deka begunaka timpuh nembuka tasat, laban kes nya bekaul enggau media rama (Facebook) sereta sekeda pekara teknikal.

Taja pia ku iya, bukti enggau barang kes deka digumpul enggau naka pengelengkas ngambika kes nya ulih didawa enggau lalu atur ke patut deka dipejalaika.

Ripot digaga bekaul enggau lambar Facebook Papagomo, ti udah ngemaruhka Nengeri Sarawak.

Iya mantaika pekara nya dikena ngenanka Menteri Dagang Temuai enggau Main Asal Datuk Seri Mohamed Nazri Abdul Aziz ti udah beserekang penemu enggau Menteri Dagang Temuai, Seni Nembiak enggau Main Nengeri Datuk Abdul Karim Rahman Hamzah apin lama udah, ke alai ulah iya udah ngeringatka rayat Sarawaki.

Ba kes ke bukai, Mazlan madahka siku pengajar lelaki ti ngachau siku nembiak lelaki ke beumur 14 taun di Kapit, udah direman pengelama tujuh hari ngambika dipansik polis.

Reman nya dipejalaika ba suspek ke beumur 42, ke mega siku pengajar sekula primari, deka abis timpuh kena 21 Jun tu.

Suspek dituduh ngereja pengawa ke kamah nya ngelui ari 50 kali di kuaters pengajar enggau mega ba bilik hotel di Kapit kenyau ari bulan Oktober taun 2015.

Ulah nya dipajakka iya taja pan nembiak nya udah nampung pelajar ba sekula sekondari. Kes nya deka ditasat nengah Seksyen 377C.