Ibun manah anak, anang nempayaka sida
Apai indai ke nempaya anak ulih lenyau hak ngibun lalu JKM ulih ngambi atur ke patut
ALOR SETAR: Ulah apai indai tauka pengibun ti nempayaka nembiak baka beambi ulih dikena malas dendam tau lenyau hak ngibun.
Menteri Pemansang Orang Indu, Ruang Bilik enggau Raban Bansa Datuk Seri Rohani Abdul Karim madah, piak sida ulih nyerahka hak ngibun ngagai kaban belayan ke dampih lalu nyema nadai kaban belayan baru nembiak nya dianjung ngagai Opis Pengintu Pengelantang Pendiau (JKM).
“Pekara tu udah dipasuk dalam Akta Kanak-Kanak 2001, pia mega nyema apai tauka indai dipeda kitai kelalu enda tan ati. Taja pia, kami deka dulu ngaga pansuk lalu beratika mayuh sukut sebedau ngaga sebarang pemutus,” ku iya.
Iya madah munyi nya ngagai pemberita pengudah ngabas Bazar Indu 1Malaysia di Lorong Sempit ditu, kemari.
Pekara tu udah dipasuk dalam Akta Kanak-Kanak 2001, pia mega nyema apai tauka indai dipeda kitai kelalu enda tan ati. Taja pia, kami deka dulu ngaga pansuk lalu beratika mayuh sukut sebedau ngaga sebarang pemutus. Datuk Seri Rohani Abdul Karim Menteri Pemansang Orang Indu, Ruang Bilik enggau Raban Bansa
Bela bisi datai Chairman Komiti Pemansang Orang Indu, Pengintu Pengelantang Raban Bansa, Pengawa Betanam Betupi enggau Pekara Bumai, Pemansang Orang Dagang Kedah Datuk Suraya Yaacob.
Rohani mansutka penemu bekaul enggau video ti benung ngerembai ba media rama apin lama ke udah mandangka seiku nembiak lelaki tiga taun dipeda kelalu lemi, enda dapat sereta mabuk, dipelaba diberi makai dadah syabu.
Taja pia, beberapa hari udah nya seiku indu beumur 27 taun ke mega indai nembiak nya, nganjung diri ngagai polis lalu madah anak iya nya kebendar nadai makai syabu, tang video nya sengaja digaga dikena medis ati exlaki iya.
Bekaul enggau nya, iya madah piak sida agi nganti pansik penuh ari polis bekaul enggau pekara nya lalu nyema indai nembiak nya nyengala enda ulih ngibun anak iya, piak JKM deka ngambi atur ke patut.
Bekaul enggau pekara bukai, Rohani madah piak sida sedia meri servis kaunseling ngagai sida ke sebilik enggau deriba bilun Soldadu Langit Diraja Malaysia (TUDM) ke bebadi nyawa ngena bilun Hawk 108, di Chukai, Terengganu ensanus.
“Taja pia, kami nemu piak sida (Raban Soldadu Malaysia) empu bisi unit kaunseling, tang kami sedia mantu enti deka nguna,” ku iya seraya ngenataika penyinu ati ngagai ruang bilik sida ke bekaul.
Dulu ari nya, iya bisi ngabas bala pedagang ba Bazar Indu 1Malaysia kelimpah nyuaka pemeri iya nya berau ungkup bala penerima bantu JKM sereta mensia mayuh.. — Bernama