Balai bomba sementara di Dalat udah tembu digaga
SIBU: Sebuah balai bomba sementara ba pelilih Dalat beungkus RM80,000 ngembuan pemesai 1,400 kaki persegi udah tembu digaga, ku Direktor Opis Bomba enggau Penyah Penusah Malaysia (JBPM) Nengeri Sarawak Nor Hisham Mohammad.
Kenu ku iya, opis bomba nya tembu digaga asil ari bantu geran projek mit menua pesisir ( MRP) Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit ke mega Kaban Kunsil Nengeri (ADUN) Dalat Datuk Fatimah Abdullah.
“Fatimah nengah MRP uya bisi meri RM80,000 dikena ngaga tu. Kami nguna RM50,000 dikena ngaga begunan tu nengah servis raban bomba volunteer sereta kaban gawa tetap ke bejalaika pengawa beripai pengelama 60 hari.
“Laluh iya RM30,000 dikena kami meli pam. Pam tu nitih pansik kami chukup muntang dikena, nyamai dibai kini-kini lalu ulih ngerara api ke bedau mau,” ku iya madah ngagai pemberita ba Pengerami ‘ Jalinan Mesra Ramadan’ Renggat JBPM Nengeri Sarawak diatur ba Balai Bomba enggau Penyah Penusah Sibu, Jalai Central ditu ensanus.
Bela bisi datai Penulung Direktor Operasyen JBPM Nengeri Sarawak Tiong Ling Hiee, pengari ketuai JBPM Zon 4 Sarawak Wan Kamarudin Wan Ahmed, Ketuai Balai Bomba enggau Penyah Penusah Sibu Abdul Mutalib Jaafar enggau Pemantu Menjina Kaunsil Pengintu Pengelantang Pendiau Anak Patu Balu Sarawak Sibu Siti Aminah Abdullah.
Ba pengerami nya, JBPM bisi nyuaka pemeri RM2,000 ungkup Kaunsil Pengintu Pengelantang Pendiau Anak Patu Balu Sarawak Sibu sereta pemeri barang pemakai ngagai bala anak patu balu.
Berebak enggau nya, iya madah balai bomba sementara nya udah ulih dibuka.
“Kena Hari Enam tu (sehari tu), kami deka nyerahka begunan tu ngagai raban bomba volunteer Dalat.
“Nya alai, kami meri besai terima kasih ngagai Fatimah laban udah bebendar mantu kami ngaga balai bomba tu.
“Diatu kami nguji ngiga kereban bomba ari perintah ngambika ulih diberi kitu sekalika nya ari bantu piak swasta. Kami pechaya pekara tu deka nyadi nyata.
“Nengah pemisi kaban volunteer ba Dalat, nya deka nyaup sida nagang penusah penusah angus sebedau ke nganti penatai raban kami ari balai bomba Mukah ke bejalai urung 40 minit ari Dalat,” ku iya nerang silik.
Udah nya, Nor Hisham madah pelilih Dalat deka bisi sebuah balai bomba tetap lalu tu udah dipasukka sida dalam rintai digaga taun 2018.
Kenu ku iya, taba balai bomba tetap tu udah bisi lalu digaga ba tanah urung tiga ekar pemesai.
“Kami ngarap taun baru balai bomba pelilih Dalat deka dikemendar laban taun tu opis menteri semina ngemendarka ngaga balai bomba pelilih Selangau aja.
“Perambu ngaga balai bomba pelilih Dalat udah dalam rintai perambu piak kami lalu dikearapka bulih pemendar ari perintah digaga ba taun baru,” ku tandu iya.
Maya ditanya pasal balai bomba pelilih Selangau, iya madah piak Opis Tanah enggau Survei (JTS) deka ngelengkaska pengawa ngatur tanah endur ngaga balai nya.
Kebuah pia, ku iya laban tanah ke bisi diatu bisi orang ngempu lalu patut nengah sekeda atur sebedau iya ulih diambi perintah.
“Ungkus ngaga balai bomba pelilih Selangau iya nya RM6.5 juta lalu piak JTS deka ngelengkaska pengawa tu.
“Nya semina ungkus ngaga balai aja bedau nyengkaum ngaga kuarters staf. Kami deka berunding ngiga belanja dikena ngaga kuarters staf laban ba Selangau chukup tusah deka ngiga rumah suwa,” ku iya.