Pemutus pasal saman dikenataika Dr Ting deka dipendingka sehari tu
KUCHING: Kot Tinggi kemari netapka seharitu endur mendingka pemutus saman ti dikenataika ex- Kaban Kunsil Nengeri ( ADUN) Pujut Dr. Ting Tiong Choon.
Akim Datuk Douglas Christo Primus Sikayun netapka hari bulan nya pengudah kededua piak luyar tembu mantaika penerang.
Ku iya, pemutus kes patut digaga enggau naka pengelengkas ke ulih laban tu bekaul enggau hari bulan Pengawa Bepilih Mit (PRK) Pujut ke nyau majak sempil.
Kededua piak, defendan enggau plaintif diungkupka dua hari meri penerang diri pasal saman dikenataika ex- ADUN nya ti ngelaban pemutus Kunsil Nengeri ( DUN) laban ti ningkilka penuduk iya nyadi ADUN.
Hari Empat tu tadi, raban luyar defenden bisi mantaika penerang panjai ba kot nya pasal nadai penaluk plaintif sereta bidang kuasa DUN ngagai kaban iya.
Kemari, plaintif madahka, timpuh penaluk iya nya subjektif.
Dr Ting ngeletak nama Speaker DUN Datuk Amar Mohd Asfia Awang Nassar, Menteri Wang Kedua Dato Sri wong Soon Koh enggau Komiti Pengawa Bepilih (SPR) nyadi defenden.
Ba saman nya Dr Ting minta penerang ke ngumbai iya lenyau kuasa pangku pengawa dibaruh Perkara 17(1) (g) Perlembagaan Sarawak iya nya dikinsil sereta enda sah.
Luyar Besai Nengeri Talat Mahmodd Abdul Rashid ngarika DUN lalu luyar Shankar Ram Asnani ngarika Asfia lalu luyar Grace Lee ngarika Wong.
Udah nya, SPR diarika luyar Azizan Arshad.
Chong Siew Chiang nyadi ketuai luyar Dr Ting.