Ripot ngagai ‘SEB Cares’ nyema bisi meda ulah nyelai

KUCHING: Sarawak Energy Berhad (SEB) ngelalau mensia mayuh ngambika ngaga kompelin nuju aplikasyen sida ke dikumbai, ‘SEB Cares’ tauka nengah lumur servis penguna 1300- 88- 3111 nyema bisi meda ulah ke nyelai.

Kenu ku iya, pengawa lengkas ngaga ripot bekaul enggau pekara nya ulih ngurangka penanggul kes enda menuku lalu nangkap sida ke salah.

Seiti kes vandalisme bekaul enggau perengka elektrik dipenggi SEB nyadi kena Hari Tiga tu tadi pengudah stesyen pampang ba Sejingkat 1000kVA diubah.

“Perengka tembaga bisi dichuri lalu piak kami rugi urung RM30,000 dikena nukar perengka nya baru.

“Kami bisi nerima kangau ari penguna urung pukul 11.01 pagi maya staf teknikal kami ngelawa palan nya pukul 11.32 pagi.

Pengudah betanya enggau bala penguna, kami baru nemu sida bisi ngasaika kuasa karan tejanggal urung pukul 2 pagi.

Nyema kami dipadah tumu, tentu kami ulih nangkap penchuri tekala nya.

Taja pia, raban kami mujur nukar perengka guna nya urung pukul 6.40 lemai hari ke sebaka, “ku Menija Kandang Menua SEB, Choo Min Chong.

Pihak SEB udah chakah agi bejalaika pengawa matau lalu ngemuntanka pengawa vandalisme nengah bantu piak polis.

Penyampau kes vandalisme ngagai perengka elektrik dirikod ba Bintulu bisi 13 kes dalam timpuh dua bulan tu.

Bekau ari ulah sida tu, penguat kuasa karan nyau nadai menuku sereta tau ngerusak perengka elektrik ke dikena bala penguna, ku tandu Choo.

Kenyau taun 2015, bisi 430 kes enchuri tembaga dirikodka SEB.

Kompeni tu nyau nguna belanja lebih RM 5.2 juta dikena nukar perengka ke dichuri nya.

Taja pia mayuh pengawa udah dipejalai dikena nagang ulah ke enda menuku nya.

Nya alai, piak SESCO minta saup mensia mayuh ngeripotka kes churi tembaga ke bisi nyadi ba palan sida diau.