MDLBS deka berandau ngemanah agi Bazar Ramadan Kem Racsom

SIBU: Kaunsil Pelilih Menua Pesisir Sibu (MDLBS) deka berandau enggau Panglima 9 Briged pasal perambu ngemanahka Bazar Ramadan Kem Rascom, Batu 10 ditu.

Chairman iya, Kaunsilor Sempurai Petrus Ngelai madah, randau nya deka berundingka pasal pengawa nyungkur enggau ngemanahka taba bazar Ramadan di Kem Rascom.

Kenu ku iya, , MDLBS telah meluluskan dua tapak bazar Ramadan pada tahun ini iaitu Sibu Jaya dan Kem Rascom.

“Ninting taun kitai nemu mayuh mensia ngelawa bazar Ramadan lalu ngujungka trafik ba bazar Ramadan kem Rascom ditu sekut.

“Nya alai, kami deka berandau enggau Panglima pasal perambu bazar Ramadan di Kem Rascom,”ku iya.

Iya mega meri terima kasih ngagai mensia mayuh enggau pedagang ba bazar Ramadan laban udah meri kerejasama ngagai piak kaunsil nemtuka trafik ditu ulih jaga.

Sempurai madah munyi nya rambau dirandau pemberita pengudah nyuaka apron ngagai 34 iku pedagang ba bazar Ramadan di Kem Rascom, Batu 10, lemai ensanus.

Ku iya, tuju pengawa meri apron nya endang dikena meransang bala padang nyaga pemeresi enggau nentuka bazar Ramadan semampai manah dipeda.

“Kami mega deka nentuka semua pemakai ke dijual ditu beresi sereta likun diempa.

“Nya alai, kami nentuka bisi unit Pengerai Mensia Mayuh MDLBS matau ba palan bazar Ramadan nya,” ku iya.

Sempurai mega ngarapka pengawa meri apron nya ulih meri penyedar ngagai bala pedagang bazaar Ramadan patut seruran ngemeratka pemeresi.

Sama bisi datai Sekretari MDLBS Justani Joni enggau raban kaunsilor MDLBS.