Semua perengka pengangkut berat ditagang nengah jalai alun berengkah 22 Jun - 2 Julai

KUCHING: Nyerumba Ops Pengerami Hari Raya, Opis Perengka Pengangkut Darat (JPJ) mansutka jaku tangkan semua perengka pengangkut ke berat ditagang betengah jalai alun berengkah 22 Jun nyentuk ngagai 2 Julai 2017.

Perintah nya dikena nentuka pemindah perengka pengangkut bukai enda napi sebarang peanggul sekumbang timpuh nya.

Nitihka penerang ari Direktor JPJ Mohd Syafiq Anas, ejensi enda kakang neritka adat ngagai orang ti ngelanggar perintah nya ke alai saman deka dikeluar tekala nya.

“Kitai nyemetak madah berengkah 22 Jun, semua perengka pengangkut berat ditagang betengahka jalai alun nyentuk ngagai 2 Julai ngambika ulih nentu pengelanchar pejalai entukar bukai.

“Berindik enggau nya, dikena nentu perintah nya dititih, raban JPJ deka matau lalu enti bisi orang ditemu ngelanggar perintah, sida deka dulu diberi jaku tangkan lalu enti mengkang enda mending, saman deka diberi tekala nya,” ku iya.

Dulu agi ari nya, Syafiq udah nguluka raban JPJ ba operasyen Khas Mutosikal nyerumba Hari Raya di sebengkah palan di Mengeri Kuching ditu, kena malam Hari Empat tu tadi.

Iya nambah, bengkah per- engka pengangkut berat ke ditagang iya nya lori, treler enggau lori kargo.

“Perintah tu enggai nyadi enda dikeluar ketegal kitai irauka perengka pengangkut ke berat deka ngujungka pemindah perengka pengangkut bukai lubah.

“Kelimpah ari nya, kitai mega bisi nerima riput diak driba sengapa ngengkah perengka pengangkut berat sida ba tisi jalai ke tau ngeruga pengelikun orang bebaik entukar kelimpah ti tau nekul pemindah entuka bukai,” ku iya.

Operasyen malam nya diadu berengkah 8 malam nyentuk ngagai 12 tengah malam sereta bela diadu diserata nengeri lalu nerima bantu raban Polis enggau Ejensi Anti Dadah Menua (AADK).

“Nengah operasyen nya, 257 saman enggau 37 nutis peresa ungkup mayuh bengkah penyalah dikeluar.

“Ungkup Pelilih Kuching, 56 saman enda ngembuan lisin dikeluar, 18 saman ketegal enda mandangka stiker ‘P’ ba entukar, 18 saman chukai jalai ngelui ari timpuh enggau 15 saman lumur plat entukar enda nitihka penetap,” ku iya.

Iya nambah, operasyen Khas Mutosikal nya mega deka dipejalai nyentuk ngagai 2 Julai.

TITIH UNDANG-UNDANG: Syafiq (dua kiba) berandau enggau seiku orang bebai mutosikal ke diperesa rambau ops malam nya.

ANTI DADAH: Raban AADK benung meresa sekeda orang bebai mutosikal ke ditan ngambi ulih diperesa kemi.

SALAH: Syafiq mandangka bengkah lumur plat ke enda nitihka penetap ke dikemendar.