Pengerami ti diintu pupu bansa pelasar ngemujur konsep 1M’sia
SRI AMAN: Sapit Menteri Dalam Menua, Datuk Masir Kujat dekaka tetiap hari besai ti diintu pupu bansa di menua tu nyadi pelasar ngemujurka konsep 1 Malaysia ti ditengkebang Menteri Besai sebedau tu.
Nitih ku iya, endang patut tetiap hari besai diintu peranak Malaysia nadai ngira di Sarawak tauka di Sabah sereta di Semenanjung Malaysia, nyadi hari besai diintu semua bansa ti berami begulai.
“Udah nyadi pengawa dikemeranka komuniti kitai kelebih agi di Sarawak maya tetiap hari besai, kitai deka ngabang ngagai kaban belayan enggau bala bakih tauka orang ti diau besemak nadai ngira penuduk, pangkat enggau jalai pengarap lalu tu ngelaika semua kitai diau dalam 1Malaysia,” ku iya.
Masir ke mega Kaban Parlimen ( MP) Sri Aman mansutka jaku tu lebuh ngulu Pengerami Ngiling Bidai Gawai Dayak 2017 diatur Indu Opis Polis Pelilih (IPD) Sri Aman di Hotel Seri Simanggang, semak ditu, malam ensanus.
Ku Masir nandu, pengawa ngabang ke baka tu nyadi pengawa ke nyelai sereta patut dikemerandi kena nyamin penyerakup ti mai pengelantang antara rayat pupu bansa.
“Penyerakup rayat pupu bansa di nengeri beguna endar dikena kitai mansang ke mua. Baka ti ditemu semua, di nengeri Sarawak, kitai bisi mayuh bansa ti diau di serata nengeri.
“Ngelama tu, kitai ulih diau begulai dalam pengelikun enggau pengelantang, kitai bebasa sereta masa jalai pengarap, main asal, adat asal bansa bukai. Berebak enggau nya, kitai ngasaika nadai agi penyarut bansa nyadi baka di menua bukai. Nya alai, nengeri enggau menua kitai patut terus idup dalam pengelantang,” ku iya.
Berindik enggau nya ku iya, rayat patut beterima kasih ngagai perintah Barisan Nasional (BN) laban bisi polisi ti chukup manah ngagai rayat pupu bansa. Perintah BN endang nadai besiping ba semua polisi enggau perambu pemansang.
“Semua bansa, mit tauka besai, semua diberi awak ti sama lalu pekara ti dikearapka aku, penyerakup rayat ti manah ke diasaika kitai diatu ukai datai pia aja. Bala tokoh politik, bala ketuai, bala ketuai komuniti dulu suba, bepuluh taun ti udah endang bebendar gawa, enda ngetu berandau ngambika prinsip penyerakup ditan ba semua komuniti enggau rayat di nengeri tu.
“Nya alai, penyereta opisopis enggau ejensi- ejensi perintah sereta Gerempung Ukai Dikuasa Perintah (NGO) ti udah mantu sereta nguna pengelandik ngatur aktiviti ke nempa penyerakup dikena ngetanka penyerakup di menua kitai amat ngagaka ati kitai,” ku iya nyemetak.