Polisi KM meri peluang baru ngagai ekonomi Sarawak
Kelimpah ari penyerakup, iya ngemeratka pemansang ekonomi digital ngambika nengeri tu maju baka menua bukai
KUCHING: Sarawak enggai tinggal ari ngasaika pemansang ekonomi ti bepelasarka digital awakka ulih setipak enggau menua maju ke bukai.
Kepala Menteri, Datuk Amar Abang Johari Tun Openg madahka menua maju diatu ulih di bediri di mua laban ke mujur nuju ekonomi bepelasarka internet.
“Sarawak enda ulih semina bekerendut dada nganti bantu datai, laban pemansang teknologi enda nganti kitai.
“Nya kebuah aku berani ngaga komitmen melanjaka RM1 bilion ari Wang Turu Sarawak empu dikena ngemansangka infrastruktur Internet di serata nengeri tu.
“Enti nadai infrastruktur internet ke chukup, juluk kitai deka ngemansangka menua tu nyadi sebuah ekonomi digital deka tesat kuing,” ku iya.
Abang Johari mansutka pekara nya dalam jaku pesan iya nyerumba Hari Raya Aidilfitri 2017.
“Pekara ti pemadu beguna iya nya pengudah kitai bisi infrastruktur Internet ke chukup, kitai enda tau enda
Sarawak enda ulih semina bekerendut dada nganti bantu datai, laban pemansang teknologi enda nganti kitai. Datuk Amar Abang Johari Tun Openg Kepala Menteri Sarawak
nyendiaka arus Internet ke deras dikena nyukung pengawa kitai mai Sarawak nuju ekonomi digital,” ku iya.
Bejaku baru Abang Johari madahka Sarawak agi sinu ati ngenang pemidang niang ex-Kepala Menteri, Datuk Patinggi Tan Sri Adenan Satem.
Polisi ‘people-centric’ Tok Nan meri mayuh pengelantang ngagai rayat tang polisi ke dibai aku iya nya meri jalai tauka peluang baru ngagai ekonomi Sarawak seraya ke meri pengarap baru ngagai rebak biak, ku iya.
Kelimpah ari nya, Abang Johari mai semua rayat Sarawak enda ngira bansa enggau peturun ngambika sama besaup ngetanka penyerakup enggau pengelantang sereta pemaik rayat di nengeri tu.
Ku iya, Sarawak tetap enda meri peluang ngagai orang ke nguji deka ngerachun runding rayat lalu nguji nempa pengeringat sereta dengki enggau pangan diri.
Penyarut enggau enda ulih seati entara rayat ku iya, nadai nguntungka sesapa.
“Rayat Sarawak amat berasai betuah laban nengeri tu ulih ngetanka pemaik enggau pengelantang jalai pengarap enggau rama ke udah lama ditempa.
“Kitai nadai belaya nadai besengki jaku enggau pangan diri pasal jalai pengarap sereta kaul rama entara kitai, laban ulah bebasaka pangan diri udah nyadi chara pengidup kitai.
“Baka ke suah dikemeranka rayat ke mayuh pupu bansa enggau jalai pengarap di nengeri tu, aram mih kitai ngerami hari ke amat besai reti enggau penegap runding ti deka begempung sereta ulih nyadi diri sebilik entara ke sama megai pengarap Islam enggau bansa ke ukai bepengarap Islam,” ku iya.
Abang Johari enggau bini iya Datin Amar Datuk Juma’ani Tuanku Bujang nesau peranak menua tu datai ngabang ngagai pengerami nyambut pengabang Hari Raya ke diatur di BCCK ditu ba hari keterubah enggau kedua raya ari pukul 10 pagi ngagai 4 lemai.
“Selamat Hari Raya Aidilfitri, Maaf Zahir dan Batin ngagai semua rayat Nengeri Sarawak,” ku iya dalam jaku pesan Hari Raya 2017.