Lima ‘flyover’ diperambu digaga semanjai jalai Kuching-Penrissen

KUCHING: Semilan belas iti pun kayu deka ditebang enggau sebuah jematan meraka deka dirubuh ketegal ti kena pansa projek Jalai Pan Borneo.

Chairman Opis Kunsil Kandang Padawan ( MPP) Lo Khere Chiang ( gambar) lebuh netapka pekara tu madah sekeda pun kayu nya ba kandang kuasa MPP lalu sekeda ke bukai ba kandang endur ke dikuasa Opis Kunsil Kota Samarahan.

Ku Lo, mayuh orang nyengkaum iya empu deka nemu kebuah pun kayu nya ditebang.

“Aku udah ngenataika tanya lalu dipadah semua pun kayu nya enggai nyadi enda ditebang lalu sebuah jematan meraka jalai deka dipindah ngambika ulih meri awak ngagai Projek Jalai Pan Borneo.

“Aku dipadah ‘ flyover’ deka digaga ba simpang lampu trafik Batu 10 besemak enggau Giant Hypermarket,” ku iya.

Lo ngelaluka perambu ngaga ‘ flyover’ ba simpang lampu trafik nya ke alai iya pechaya nya ulih ngurangka penanggul entukar besekut ba jalai alun entara Batu 9 enggau Batu 10.

Kelimpah ari Batu 10 ku iya, empat simpang lampu trafik semanjai jalai Kuching- Penrissen iya nya dalam pegai MPP mega deka diganti enggau ‘ flyover’.

Ku iya, empat simpang lampu trafik ke diperambu diganti iya nya ba Batu 4, Batu 6, Batu 7 enggau Batu 9 Jalai Kuching- Serian.

Perambu ngaga lima ‘ flyover’ nya ku Lo entara sebagi ari projek Jalai Pan Borneo ke beungkus RM16 bilion.

Lo madah projek ‘ flyo- ver’ ba Batu 4 disadang berengkah ba bulan Ogos lalu ditangkanka enggau projek ba Batu 10.

“Aku dipadah semua projek deka tembu digaga ba taun 2020.

“Tembu ila, semua ‘ flyover’ deka ngelanchar pejalai perengka pengangkut ari Batu 4 nyentuk ngagai Batu 10,” ku iya.