Puku RM200,000 dikena mungkal projek ngaga paking kerita Rh Suring
BINTANGOR: Puku RM200,000 chara keterubah dikena Kaban Kunsil Nengeri (ADUN)
Meradong Datuk Ding Kuong Hiing mutarka penanggul nadai paking kerita ba Rumah Suring Sana, Sungai Tulai ditu.
Tang ku iya, iya deka berandau enggau piak Opis Kereja Raya (JKR) dulu ngiga chara ke engkeman dikena bejadika projek nya.
Iya madah, tu bepun ari gaya rampa menua ngelawa rumah panjai nya bepenanggul digagaka palan alai ngengkahka kerita lalu meseti digagaka jematan dulu sebedau projek nya ulih digaga.
“Ditu mega enda chukup tanah dikena ngaga ban dulu sebedau kitai deka berunding nyediaka taba ngaga palan endur ngengkahka kerita.
“Tang kita anang irau laban aku deka berandau enggau JKR kelimpah ngiga chara ke pemadu engkeman ngambika projek tu mujur digaga,” pia ku iya madah maya ngulu Pengerami Ngiling Bidai ba rumah panjai nya di Bintangor, bedau lama.
Projek tu endang lama udah dianti peranak Rumah Suring kenyau ari lebih 30 taun ke udah.
Ngelama tu sida serumah pemanjai 37 pintu nadai chara bukai kelimpah nyerak paking kerita ba rumah panjai sepiak ti mega palan nya enda tetapika penyampau kerita dia lebih agi maya bisi pengerami tauka hari Gawai Dayak.
Ba pekara politik, Ding maya tu ngarapka peranak rumah panjai nya semampai ngetanka sukung ngagai Barisan Nasional (BN) maya Pengawa Bepilih Besai (PRU) ti deka datai.
Ku iya, sukung rayat beguna bendar dikena nentuka BN mujur ngambi pulai penuduk Parlimen Sarikei maya PRU nya ila.
“Kitai BN udah bisi DUN ba Parlimen tu lalu kitai andal amat ulih ngempu penuduk Parlimen Sarikei.
“Enti tu mujur ila pemansang ba Parlimen Sarikei deka lantang agi digaga nyengkaum kita di rumah panjai tu,” ku iya madah baru.
Awak nya mega dikena Ding mantaika seiku ari chalun Parti Sa’ati Rayat Sarawak (SUPP) ti deka disabung ba penuduk Parlimen Sarikei maya PRU tu iya nya Teng Ung Woo.
Teng mega Sekretari Politik Kepala Menteri enggau Ketuai Raban Nembiak SUPP Pampang Sarikei.