Padahka Opis Pelilih nyema bisi napi penyuntuk ai irup beresi
JULAU: Mensia mayuh ti napi penyuntuk ai irup beresi di sitak Parlimen Julau dipinta anang sanggu madahka penanggul nya ngagai Opis Pelilih kandang menua sida.
Kaban Parlimen Julau Datuk Joseph Salang Gandum madah, bala Tuai Rumah patut mantaika pekara tu nyengkaum madahka dini alai rumah panjai sida enggau penyampau pintu bilik ke napi penanggul nya.
“Penanggul tu majak bisi nyadi kemaya hari tu bepun ari pengawa ngemansangka tanah lebih agi baka berimbaka tanah alai nanam kelapa sawit.
“Ari nya, ai ke diulih ari sungai enda likun diirup laban dikeruga rachun tauka sum ke dikena kebun dandang besai nerusur ngagai sungai,” pia ku iya madah.
Salang mantaika pekara nya maya pengerami pemesai be- gulai enggau rayat ba Rumah Seman Panting di Ulu Sungai Lasi, Julau ditu, ensana.
Ketegal pekara tu, iya mega madahka diri udah nulis surat ngagai Menteri Besai Datuk Seri Najib Tun Razak minta puku RM40 juta dikena ngemesaika agi palan ngubat ai di Julau iya ke diatu ngambika mayuh agi endur ulih disambung enggau bekal ai beresi.
“Aku mega udah mantaika pekara tu maya aum parlimen,” ku iya madah baru.
Berindik ari tu mega, Salang ngansak piak ti bekaul enggau bekal ai ulih besaup ngiga runding mutarka pekara nya.
Bekaul enggau pengawa nyukat kelinggi tanah ke digaga perintah nengeri, iya ngarapka sida ke beempu tanah anang nanggi laban perintah endang enda ngambi tanah sida.
Ku iya, pengawa nya digaga perintah nengeri laban deka ngelai tanah rayat enggau antara tanah perintah nengeri.
“Enti tanah kita udah bisi entara, pengawa meri surat pala tanah mega nadai bepenanggul.
“Ari nya, kita deka lantang agi ngemansangka tanah diri baikka begulai enggau piak bukai baka kompeni luar tauka ngemansangka tanah nya enggau chara diri empu,” pia ku iya nerang.
Ba pengerami tu mega, Salang bisi nyuaka geran projek mit menua pesisir sepenyampau RM398,000 ngagai 31 buah rumah panjai ari Lasi, Merurun, Balut enggau Jugam ti mega nyengkaum RM50,000 dikena nyaup Opis Pelilih Julau ngatur Pesta Lada Julau ti deka dipenyadi taun ti deka datai.