PRS Pakan udah nyuaka bantu ngagai Rumah Mandau

SARIKEI: Raban Parti Rayat Sarawak (PRS) Pampang Pakan udah datai nyuaka bantu ngagai Rumah Mandau Bilie, Garu Sebangkoi ti udah ditinggang penusah angus.

Penatai sida betuaika Kunsilor Tuai Rumah (TR) Jantan lalu disempulang Sapit Raban Nembiak PRS Pakan TR Morris, Ketuai Raban Indu PRS Indu Fitz Patrick enggau Kaunsilor TR Eddy Madang.

Dulu agi ari tu, Kaban Parlimen (MP) Julau Datuk Joseph Salang Gandum minta raban sida datai nyuaka tulung ngagai rumah panjai nya.

Pemeri sepenyampau RM1,200 tu datai ari pupu komiti PRS, Raban Indu PRS enggau Raban Nembiak PRS.

Kena 25 Jun tu tadi, 12 pintu Rumah Mandau angus urung 10.50 pagi.

Taja pan baka nya, nadai penusah bebadi diripotka nyadi. KUCHING: Bisi 15 iku raban indu udah nembuka belajar ajat Orang Ulu tauka ‘Kajet Doh’ dalam jaku Kayan, ke diatur ASADIA.

Kelas ke diatur dalam timpuh dua bulan nya ke diajar Orang Ulu, dipasuk bala indu bansa kitai Iban enggau Bidayuh ke diau sereta ngelinggi mengeri Kuching.

“Tu ngayanka bansa kitai Dayak ulih beserakup enti pekara nya bisi tuju tauka mai pemanah,” ku Ketuai ASADIA, Mabong Unggang madah ngagai Utusan Borneo.

Kelimpah ari nya dikena neruska main asal bansa Dayak kelebih agi kitai Iban, ASADIA ngerembaika kelas belajar ngajat Iban ngagai menua Siburan ke bisi disereta 18 iku orang indu.

Ku iya di Siburan kelas nya diatur ba palan bebeli barang ke dikearapka ulih matak mayuh agi orang indu di kandang menua nya belajarka main asal bansa.

“Nengah chara ngatur kelas belajar ngajat ba palan ke dilawa orang mayuh tu endang bisi pemanah.

“Bala orang ke datai bebe- lika barang ngelimpang diri ngemataka kelas ASADIA nya seraya bisi madahka diri rindu sereta deka masuk kelas tu,” ku iya.

Kelimpah ari nya Mabong bisi perambu deka muka kelas belajarka main asal bukai baka betabuh, sape, gendang pampat enggau ke bukai.

Iya ngarapka orang mayuh terus nyukung pengawa ke dipejalaika ASADIA ti deka ngetan enggau ngerembaika main asal bansa kelebih agi main asal kitai Iban ngagai rebak baru enggau dudi.

Berebak enggau tu iya mega meransang raban orang ke kala belajarka main asal enggau ASADIA sebedau tu dikearapka ulih belajar baru main asal nya nengah program ke diberi nama Belajarka Baru Main Asal (BBMA) ba ASADIA. Pekara tu tau ditanya ngagai Mabong empu.

NAMBAHKA PENGELANDIK: Entara 15 iku bala indu Iban enggau Bidayuh nambahka pengelandik ba main asal masuk kelas belajarka ajat Orang Ulu tauka dikumbai Kajet Doh dalam jaku Kayan, begambar bebala mayuh enggau Mabong (bediri, tiga ari kiba).

SAUP ARI KAMI: Jantan (enam kiba) sereta disempulang bala bukai nyuaka bantu ngagai Rumah Mandau, Sarikei ditu.