80 peratus sitak Baleh ulih dilawa nengah jalai darat
Rayat meseti besabar laban tetiap projek pemansang ke dilangkar endang begunaka timpuh ke panjai
KAPIT: Kira-kira 80 peratus sitak Kunsil Nengeri (DUN) Baleh udah datai jalai kelebih agi ke disambung enggau jalai digaga kompeni kem batang, pia ku jaku Sapit Kepala Menteri II Tan Sri Datuk Amar Dr James Jemut Masing.
Ku Masing, rayat patut besabar lalu mereti laban tetiap pengawa bejalaika projek pemansang di sekeda kandang endur endang begunaka timpuh ke panjai.
“Pemansang endang begunaka timpuh ti panjai. Keterubah suba kenyau ari 30 taun ti udah, palan tu (Baleh) nyauka enda ulih dilawa. Tang diatu, kandang menua tu udah ulih dilawa nengah jalai darat, taja pan agi ngena jalai batang. Pia mega sekeda kandang endur udah ulih nerima arus internet nengah menara telekomunikasyen ba baleh,” ku iya.
“Pemansang deka terus diasai nyema kitai semua besabar lalu seruran meri sukung. Aku chukup andal meda sukung peranak ba sitak Baleh ngagai aku kenyau ari 30 taun tu. Sekeda ari Tuai Rumah (TR) agi bisi mengkang enggau aku pengelama 30 taun tu. Tu mandangka sukung sida enda leju ngagai aku. Ketegal pekara tu, kitai bisi ditu diatu,” ku Masing lebuh bejadika Pengerami Ngiling Bidai ba Rumah Gendang di Sungai Puro, Gaat, Baleh bedau lama.
Masing ke mega Menteri Pemansang Infrastruktur enggau Perengka Pengangkut madah, urung 54 taun suba Kapit iya nya sebangakah kandang menua ti enda ulih disambung enggau kandang menua bukai di nengeri tu.
Pemansang endang begunaka timpuh ti panjai. Keterubah suba kenyau ari 30 taun ti udah, palan tu (Baleh) nyauka enda ulih dilawa. Tang diatu, kandang menua tu udah ulih dilawa nengah jalai darat, taja pan agi ngena jalai batang. Pia mega sekeda kandang endur udah ulih nerima arus internet nengah menara telekomunikasyen ba baleh. Tan Sri Datuk Amar Dr James Jemut Masing Sapit Kepala Menteri II
“Tang diatu, dalam timpuh empat taun ti deka datai Kapit ulih disambung enggau kandang menua bukai di nengeri tu lalu ukai agi pulau di Borneo tu,” ku iya ke mega Kaban Kunsil Nengeri (ADUN) Baleh.
Ku iya nyemetak, semua pemansang tu iya nya asil ari sukung ti tegap ari peranak ba sitak nya ngagai pengari rayat ke dipilih sida ngelamatu.
“Berindik ari nya, aku chukup beterima kasih ngagai sukung rayat sereta udah pechaya ngagai aku lalu aku deka nentuka sida semua ngasaika pengelantang ari pemansang ke diguna semua, ambika chunto pemisi tekad hidro elekterik Baleh enggau ke bukai,” ku iya.
Ba pengerami nya, Masing mega udah bejadika projek tung nyimpan ai di Rumah Gendang.
Sama bisi rambau pengerami nya Kaban Parlimen (MP) Hulu Rajang Datuk Wilson Ugak Kumbong, ADUN Pelagus Wilson Nyabong Ijang, Residen Kapit Joseph Belayong Punan, Pemesai Pelilih Bukit Mabong Doughlas Pungga enggau Tuai Kunsil Opis Pelilih Kapit Philimon Nuing.