Isu ‘setinggan’ di DUN Tupong patut diputar enggau lengkas
KUCHING: Kaban Kunsil Nengeri (ADUN) Tupong, Fazzrudin Abdul Rahmah nguji deka berandau enggau perintah bekaul enggau atur dikena mutarka isu ngentak rumah ti nadai pemendar (setinggan) ba sitak nya.
Iya madahka taja pan semina mungkur beberapa ruang bilik tang iya deka mutarka isu nya sereta meri pilih ke patut ngagai ruang bilik ke bisi dia nyengkaum meri penemu sentang skim nangkir genturung pendiau.
“Ba sitak ke diarika aku tu bisi mimit penanggul setinggan, iya nya peranak ti diau ba tanah orang bukai. Enti nya tanah orang bukai bisi tusah mimit deka ngatur.
“Kitai ulih meri sida pilih sekalika nyediaka endur tauka flat lalu engka kitai nguji deka berandau enggau perintah ngambika ngiga genturung pendiau ke ulih ditangkir, ti ulih alai sida ke bisi ati nya nangkir.
“Pemayuh sida tu kurang ari 20 buah ruang bilik ke diau ba setinggan di kandang endur Pinang Jawa enggau sekeda endur ba Jalan Astana,” ku iya lebuh dikerandau raban pengarang berita bedau lama.
Fazzrudin dikerandau nyerumba pengerami Rumah Terbuka Aidilfitri N.6 Tupong iya ke diatur ba Dewan Bahasa dan Pustaka ditu.
Nambahka nya, lebuh ke ngenang pasal Projek Transformasyen Menua Pesisir (RTP) taun 2016 ba sitak nya, tebal agi udah tembu lalu bisi sekeda agi dalam proses ngaga kelebih agi projek besai ke begunaka timpuh lama.
Lalu projek RTP taun 2017, semua udah dikemendarka nyengkaum langkar sereta spefikasyen udah tembu digaga sereta tinda deka dibuka enda lama agi.
“Aku mega melabaka tebal ari projek nya deka tembu ujung taun tu, lalu projek ke begunaka timpuh panjai baka ngaga surau dipelabaka tembu ujung taun siti nyin ila.
“Enti enda saru aku, bisi lebih 40 iti projek besai enggau mit RTP lalu penyampau semua belanja urung RM5 juta.
“Projek ti dikemekuhka iya nya mayuh macham baka surau, palan rekreasyen, sereta infrastruktur baka parit, jalai enggau jematan, lalu nya semua bepanggai ngagai nama ke diguna peranak ba tetiap genturung pendiau nya,” ku iya.