Pidato Iban UB-AEDIL: Pelasar mantaika pengelandik bejaku ba mua mayuh
KUCHING: Bala nembiak sekula sekondari, IPT enggau mensia mayuh ti beumur baruh ari 45 taun, ke bisi ati deka masuk Pekit Pengelandik Bejaku (Pidato) dalam jaku Iban diperansang ngerejista diri sebedau 22 Julai tu.
Sekretari komiti pekit nya, Mathias madahka bala ti bisi ati tu tau ngerejista diri nengah platfom ti udah disediaka komiti baka ngisi pom pekit ti deka dikeluarka ba surat berita Utusan Borneo enda lama agi, nengah facebook UB- AEDIL Pidato Iban 2017, nganjung penerang diri , kategori enggau topik sida nengah WhatApps tauka betefon terus ngagai komiti pekit.
“Bala ti bisi ati masuk ba pekit tu tau gerejista diri nengah platfom ti udah disediaka,” ku iya.
Naka ke diatu respon ari mensia mayuh ba tetiap kategori ke deka nyereta pekit nya chukup manah, taja pia raban komiti agi meransang ngambika mayuh agi bansa kitai Iban masuk pekit ti nyadi pelasar endur mantaika pengelandik bejaku, penemu enggau pemerani bejaku ba mua mensia mayuh.
Kelimpah ari, semua institut pematih pengajar di serata Sarawak mega bisi mandangka suku deka nganjung pesereta sida.
Kena lemai Hari Tiga tu tadi, raban komiti pengatur Pekit Pidato UB -AEDIL tu bisi berandau lalu dipancharka terus nengah stesyen radio Catsfm.
Ba randau pengelama sejam nya, raban komiti bisi nyebut silik pasal langgur penemu ngatur pekit, atur pekit, sekeda program kedeka diatur maya final pekit nya kena 8 Ogos tu enggau sekeda pekara bukai ke bekaul.
Tu kedua kali raban tu pansut ba radio pengudah interbiu keterubah begulai enggau DJ Wit Malang, RTM Waifm ba program Mansang Sarawak Mansang apin lama ke udah.
Mathias mega madah, tu mih keterubah endar pekit pidato dalam jaku Iban ke ngemesai tu diatur di nengeri tu.
Tu mih awak ke chukup manah ngagai semua raban bansa kitai Iban mansangka ke mua lalu mantaika penemu diri bemalinka topik ti diberi komiti pengatur seraya ngulihka peneleba bejaku ba mua mayuh.
Ba pekit tu, perais ti disediaka chukup manah ke alai champion ungkup kategori nembiak sekula deka mai pulai perais mata duit RM1500, trofi enggau setipikit, lumur dua, RM1000, trofi enggau setipikit, lumur tiga RM500 trofi enggau setikit lalu iti perais sagu ati ke deka mai pulai mata duit RM200.
Ungkup kategori nembiak IPT enggau tebukai ngagai mensia mayuh ke beumur 45 taun ke baruh, perais ti disediaka ngagai champion iya nya mata duit RM 2000 , trofi enggau setipikit, lumur dua RM 1500, trofi enggau setipikit, lumur tiga RM1000, trofi enggau setipikit sereta tiga perais sagu ati RM 200.
Pekit Pidato ke deka diatur tu dikemendarka Direktor Opis Pelajar Sarawak sereta disukung Sapit Menteri Tan Sri Dr James Masing ke mega nyadi patron, sekeda bala YB enggau menteri Dayak ke bukai nyengkaum NGO Dayak.
Komiti pengatur pekit mega meri terima kasih ngagai sukung ari stesyen radio baka RTM Waifm enggau Catsfm ti seruran nyukung ari sukut promosyen ngemujurka pekit.