JKN patut nerangka pejalai projek ngemanahka lif HUS

KUCHING: Mandal Ketuai Biro Indu Parti Keadilan Rakyat (PKR) Voon Shiak Ni kemari minta Opis Pengerai Nengeri (JKN) meri penerang baru bekaul enggau pengawa ngemanahka lif ke jai ba Sepital Besai Sarawak (HUS).

Iya madahka, Jabatan Kereja Raya (JKR) nengeri dalam penerang ke dipansutka bulan nyin kemari madahka pengawa ngemanahka lif SGH ke jai nya deka dipejalaika bulan tu, lalu udah dikemendarka Opis Menteri Pengerai (KKM).

“Enda lama agi bulan Julai lalu kitai ngarapka opis pengerai ulih meri penerang baru ngagai orang mayuh nyema pengawa nukar lif ke jai nya udah berengkah... enti udah, ni naka ke udah dipejalaika,” ku iya nengah penerang berita ke disadung ngagai pengarang berita maya baum pengarang berita ke diatur ba Pusat Servis PKR Stampin bedau lama.

Nitih ku Voon, pengelama lif nya dikena urung 21 taun lalu semua nya patut ditukar.

Iya madahka lebih RM5 million udah diungkupka dikena nyendiaka lif baru, ti udah dipadahka Menteri Pengerai Datuk Seri Dr S. Subramaniam maya baum Parlimen bulan November taun nyin kemari.

Baka ke dipadahka ngagai iya ku Voon, kunteriktor deka bejalaika pengawa nukar lif ke udah bisi nya enti lif ke baru udah bisi kena bulan ke deka datai tu.

Iya ngingatka JKM ngambika terit agi sereta seruran bejalaika pengawa ngemanah enggau nyaga lif ke udah bisi nya seraya nganti lif baru datai.

Nambahka nya iya ngingatka kunteriktor ke udah diberi tanggungpengawa nya patut dipatau tauka diperatika, ngambika pengerusak lif ke ulih meri penusah ngagai bala pesakit nya enda nyadi baru jemah ila.

Baka kes ke nyadi taun nyin kemari, seiku indu betubuh bisi beranak dalam lif ke jai.

Bekaul enggau palan paking kerita beringkat, iya minta KKM meri penerang ti pemadu baru ngagai orang mayuh pasal projek nya. Voon mega madahka projek nya udah diberi ngagai Weida ( M) Bhd enggau ungkus belanja RM378 million.

Projek nya dipelabaka deka tembu dalam timpuh 36 bulan, ku iya seraya deka nemu kemaya projek nya berengkah dipejalaika.

“Aku deka nerang senentang isu guna palan paking kerita beringkat ba HUS ti udah sepuluh taun enda teputar... Kitai udah betaun nyebut pasal tu lalu udah leju enggau semaya ke enda dikeamat nyentuk seharitu,” ku iya.

Iya mega madah penyampau agih belanja RM378 juta endang penyampau ti kelalu besai.

“Kami minta ngarika pemayar chukai penerang pasal semua penyampau nya ti diagih ungkup palan paking kerita beringkat, palan nyaga nembiak enggau hotel bajet,” ku iya.

Ku iya, nya ngambika semua orang nemu kini penunga semua belanja nya.

Iya minta perintah nengeri ngambika terit agi matau belanja ti diungkup ngagai HUS lalu nyekat sebarang pengerua enggau penanggul projek.