Program Ngabang Aidilfitri ADUN Tupong diintu enggau richah

KUCHING: PengawaNgabang Aidilfitri Kaban Kunsil Nengeri (ADUN) Tupong Fazzrudin Abdul Rahman enggau bini iya Norazlin Sapawi udah diintu enggau rami ti mega bisi nerima penatai pengabang pemadu dipebasa iya nya Kepala Menteri, Datuk Amar Abang Johari tun Openg disempulang bini iya Datin Amar Datuk Juma’ani Tuanku Bujang.

Pengabang bukai ke bisi datai nyengkaum Menteri Kereja Raya ti mega Kaban Parlimen (MP) Petra Jaya Datuk Seri Fadillah Yusof enggau bini iya Datin Seri Ruziah Mohd Tahir sereta Menteri ba Opis Menteri Besai Datuk Seri Nancy Shukri enggau Menteri Kaunsil Kandang Menua enggau Pengawa Berumah Datuk Prof. Dr Sim Kui Hian.

Nambahka nya bala ketuai opis perintah sereta bisi beribu iku mensia mayuh ari pupu raban bansa bisi datai ngagai atur pengawa nya ke diatur ba Dewan Bahasa dan Pustaka ditu, bedau lama.

Fazzrudin lebuh dikerandau pengarang berita madahka pengerami Hari Raya nya chukup richah ke sama diintu pupu bansa di nengeri tu.

“Tu seiti kelai ke amat manah sereta ngayanka penyerakup, pengelantang enggau pemaik dalam sitak N.6 Tupong enggau komuniti di mengeri Kuching ke chukup manah enda ngira sekalika Hari Raya, Hari Gawai tauka pengerami bukai.

“Tu ulih dipeda kitai maya kitai ngulu atur pengawa ngabang ke diatur bala pemesai, pengabang ke datai iya nya pupu bansa sereta bebida jalai pengarap,” ku iya.

Pengabang ke bisi datai rambau atur pengawa nya disediaka enggau mayuh macham pemakai sereta ai irup nyengkaum rendang manuk, lemang, macham bansa kuih, laksa, mi kolo, mi jawa sereta mayuh pemakai ke bukai.

Kelimpah ari nya pemerindang atas panggau ke mai lagu raya mega bisi diatur dikena merindang mensia mayuh ti datai.