Palang jalai deka digaga lengkas ba Jalai Marudi
KUCHING: Palang jalai deka lengkas digaga ba Jalai Marudi dikena nagang perengka pengangkut berat ke mai barang ngelui ari pemerat ke patut ari nengah sereta ngerusakka jalai semanjai 44 kilometer (km) nya.
Sapit Kepala Menteri, Tan Sri Datuk Amar James Masing madahka perintah nengeri ngungkupka lebih ari RM70 juta dikena ngaga jalai nya awakka bisi ditengah penguna enggau perengka pengangkut bukai kelimpah ari ke berat.
Tang ku Masing ti mega Menteri Pemansang Infrastruktur enggau Perengka Pengangkut, jalai nya mega ditengah dua raban penguna ke ukai patut nengah jalai nya, iya nya lori kayu batang enggau lori pengangkut buah sawit ke mai pemerat ngelui ari pematut.
“CMS ( Cahya Mata Sarawak) udah ngemanahka jalai nya tang sehari dua udah nya jalai tu jai baru ketegal dua raban penguna nya.
“Aku merambu kitai ngaga jalai tu sekalika ngena chara ti mar ke ulih tetangkupka berat semua bansa perengka pengangkut tauka kitai nagang perengka pengangkut berat ke mai barang ngelui ari pematut ari nengah jalai tu,” ku iya.
Iya mansutka pekara nya ngagai pengarang berita pengudah nyuaka chek geran projek menua pesisir (MRP) sepenyampau RM245,200 ngagai 21 penerima ke diatur ba opis iya di Ringkat 5, Begunan Baitulmakmur ditu, kemari.
Bejaku baru Masing madahka diri beratka penguna bukai ke nengah jalai nya lalu nya kebuah iya deka ngereja enda ngira chara dikena nagang perengka pengangkut berat ke mai barang ngelui ari pematut nengah lalu ng- enyaika jalai nya.
Enti pekara tu dilakka aja, pengawa ngemanahka baru jalai nya enda ulih dipejalaika lalu perintah nyau mayar enggau belanja besai tetiap kali lori nengah jalai nya.
Nya kebuah ku iya, palang jalai enda tau enda digaga dikena nyeliahka penanggul sama ti kala ditapi sebedau tu ke nyadi ba Jalai Bakun.
“Kena 7 Julai tu aku deka ke Marudi lalu meda baru jalai tu sereta kitai berundingka chara dikena mutarka penanggul tu,” ku iya.
Ngenang pasal pengawa nyuaka chek geran MRP nya, Masing ti mega Kaban Kunsil Nengeri ( ADUN) Baleh madahka iya diberi RM4 juta MRP dikena bejalaika mayuh bengkah projek.
Ari penyampau nya ku iya, RM2.6 juta udah dibelanja ngagai kandang menua Baleh ke alai naka ke diatu semua rumah panjai, serakup enggau Gerempung Ukai Dikuasa Perintah (NGO) dalam sitak Baleh udah diberi MRP ungkup taun tu.
MRP sepenyampau RM245,200 diagihka kemari mungkur 21 penerima ari luar sitak Baleh, dikena bejalaika pekara ke patut baka ke dipinta.
“Ngarapka sida ke nerima geran sehari tu ( kemari) ngena geran tu nitihka juluk tauka tuju baka ke udah dipadahka.
“Aku amat gaga ati meri geran tu laban aku nemu perintah begunaka sukung ari rayat dikena ngemansangka menua tu,” ku iya ngagai pengarang berita.
Sama bisi datai ngemataka pengawa nyuaka MRP nya kemari ADUN Murum, Chukpai Ugon enggau Sekretari Politik Kepala Menteri, Angeline Umih Tujok.