Projek jalai puntan ketegal ulah ngerunding diri aja

Seraban peranak menua udah nagang projek ngaga Jalai Long Lama-Ulu Baram ti beungkus RM700j nya

KUCHING: Juluk ati peranak Baram ti minta perintah neruska pengawa ngaga Jalai Long Lama-Ulu Baram ditagang ulah sekeda orang ti semina ngerunding diri aja ari kandang menua nya empu.

Sapit Kepala Menteri, Tan Sri Datuk Amar James Masing madah, pengawa ngaga jalai nya keterubah endar digaga dikena meri jalai ngagai pengawa ngaga projek Tekat Hidro Elektrik (HEP) Baram.

Tang bisi seraban peranak menua nya ti nagang pengawa ngaga HEP Baram nyentuk ke perintah ngaga pemutus ngetuka projek nya.

“Aku dipadahka ngaga HEP Baram tu deka nyadi penyungkak ngagai peranak di Baram tu lalu semina seiti tu aja chara dikena narit pemer- anak puku ari menua luar.

“Nya kebuah aku deka nentuka Tekad Baleh digaga laban enti nadai Tekat Baleh, peranak ba kandang menua tu deka nadai jalai,” ku Masing.

Masing ti mega Menteri Pemansang Infrastruktur enggau Perengka Pengangkut madah, rayat patut ulih meretika penusah ngaga jalai enti semina nyambung ngagai beberapa rumah panjai aja.

Tang ku Masing, pengawa ngaga jalai mega patut beratka penguntung sereta empas ngagai rayat enggau nengeri.

“Nya alai aku deka ngenukuka Tekad Baleh tu mujur laban enti nadai tekad tu jalai pan nadai.

“Peranak di Baram enda tau enda ngaga pemutus sekalika dekaka tekad digaga sereta meri penguntung ngagai sida di Baram sereta serata Sarawak tauka enda,” ku iya

Masing meri penerang nya lebuh ke ngenang pasal peminta peranak Baram ke dekaka perintah neruska pengawa ngaga Jalai Long Lama-Ulu Baram, taja pan projek HEP Baram udah diketuka.

Dalam ripot berita ensanus, Kaban Kunsil Nengeri (ADUN) Telang Usan, Dennis Ngau madahka projek jalai nya udah berengkah digaga beberapa meter tang diketu ketegal ditagang seraban peranak menua nya.

Berindik ari penanggul nya, dipadahka ungkup belanja sepenyampau RM700 juta ungkup projek Jalai Long Lama-Ulu Baram dipelabaka dikena ngaga projek bukai.

“Aku gaga amat ati laban peranak di Baleh mending sereta nyukung perambu perintah ti deka ngaga Tekad Baleh.

“Taja pan seiku dua ti mantah tang kitai ulih mutarka ngena chara manah. Pekara ti pemadu beguna tekad nya enda tau enda dipajakka,” ku iya.

HEP Baleh diatu benung digaga ke alai sekeda pakej udah diberi sereta jalai penyambung ari Kapit ke Ulu Baleh dipelabaka tembu dalam timpuh tiga taun tu.

Peranak di Baram enda tau enda ngaga pemutus sekalika dekaka tekad digaga sereta meri penguntung ngagai sida di Baram sereta serata Sarawak tauka enda. Tan Sri Datuk Amar James Masing Sapit Kepala Menteri Sarawak