Pengerami Hari Raya pelasar ngulih timbal ari raban ke dibantu: Rohani

KUCHING: Pengerami Hari Raya ke diatur begulai enggau raban orang ke begunaka bantu Opis Menteri Pemansang Orang Indu, Ruang Bilik enggau Raban Bansa, nyadika pelasar endur opis menteri ngulihka timbal ari raban nya.

Menteri iya, Dato Sri Rohani Abdul Karim madahka pengerami mega dikena ngerapitka kaul opis menteri sereta semua ejensi dibaruh kuasa iya begulai raban orang ke begunaka tulung ari opis menteri nya.

Pengerami Begulai Ngintu Aidilfitri ‘Indahnya Beraya’ bisi digulu raban nyelai pendiau (OKU), indai tunggal, orang tuai, orang seranta, gerempung ukai dikuasa perintah kelimpah ari raban volenteer ti mantu maya penyadi penasah ngenyit.

“Ba aku kebuah ke ngangauka semua raban nya laban deka meri pengaga ati sereta ngerapitka kaul kami ti nyadi opis menteri ke nyaga raban nya ke dikumbai orang ke begunaka tulung kami.

“Maya tu mega aku bulih timbal ari raban nya, lalu maya tu mih peluang ke manah endur ngenataika pekara ti manah awakka kami ulih ngemanahka nyengkaum polisi enggau pengawa ti dikereja enggau ke bukai.

“Ba aku tu mih awak ti manah endur sida ngenataika pekara,” ku iya seraya madahka diri gaga enggau temegah ati laban Kepala Menteri Datuk Amar Abang Johari enggau bini iya Datin Amar Datuk Juma’ani Tun Tuanku Bujang bisi datai ngagai pengerami nya.

Rohani mansutka pekara nya dalam aum pengarang berita Majlis Bersama Raikan Aidilfitri ‘Indahnya Beraya’ ke diatur opis menteri iya ba DUN lama ditu, ensanus.

Sama bisi datai ngagai pengerami nya kemari Menteri Pengintu Pengelantang Pendiau, Pengelantang Raban Bansa, Orang Indu enggau Pemansang Nembiak Mit Datuk Fatimah Abdullah; Speaker Kunsil Nengeri Datuk Amar Mohamad Asfia Awang Nassar; Menteri Kereja Raya Datuk Seri Fadillah Yusof; Menteri ba Opis Kepala Menteri Datuk Talib Zulpilip; Menteri Muda ba Opis Kepala Menteri Sharifah Hasidah Sayeed Aman Ghazali, Direktor Opis Pengintu Pengelantang Pendiau Raban Bansa Abang Shamshuddin Abang Seruji enggau ke bukai.

Pengerami nya program ke diatur opis menteri nya ninting taun kelebih agi di Sarawak, lalu taun tu di Putrajaya pengerami ke sama deka diatur dalam minggu baru.

Pengabang ke dikangau datai ngagai pengerami nya bisi disediaka mayuh macham pemakai enggau ai irup.

Nambahka nya bala pengabang mega diperindang ngena macham lagu raya kelimpah ari Abang Johari mega bisi nyadaka sera nyawa iya.

Ba pengerami nya opis menteri ti diarika kepala menteri nyuaka pemeri ngagai raban orang ke begunaka bantu.