Peranak Rh Mandau terus nerima bantu ari mayuh piak

SARIKEI: Sida ke tasah angus ba Rumah Mandau Sebangkoi Sarikei, terus nerima perati ari mayuh piak nyengkaum gerempung ukai dikuasa perintah (NGO), orang seikuseiku sereta organisasyen perintah.

Sebengkah NGO ke baru udah ngenataika bantu ngagai peranak rumah panjai tu iya nya Gerempung Nembiak Dayak Sarawak (PEBEDAS) Sarikei.

Chairman iya, Alex Chia, madah, piak sida sinu ninga penusah ke udah nuntung peranak rumah panjai nya lalu sida datai mantu enggau naka ulih diri dikena ngelempungka tating penusah ke ditapi.

“Bala kaban PEBEDAS bela besaup ngumpul bantu ngambika bisi dikenatai ngagai sida ke tasah.

“Entara bantu ke mujur digumpul bala kaban PEBEDAS iya nya bantu duit, gari, barang pemkai sereta sekeda barang dapur.

“Ngarapka nengah bantu tu iya ulih ngelempungka mimit tating penusah ke ditapi sida, seraya ke ngantu bantu bukai,” ku iya rambau dirandau media, ensanus.

Bela bisi datai nyuaka bantu tu Chairman PEBEDAS Sibu, Mathew Mudai enggau Chairman PEBEDAS Saratok, Ibil Jaya.

Udah nya, bela bisi datai nyuaka bantu ngagai sida ke tasah angus tu iya nya Junior Chamber International ( JCI) Mandrin Repok.

Chairman JCI Mandrin Repok, Eileen Wong madah, aktiviti tu endang sebagi ari tanggungpengawa rama gerempung tu ngagai mensia mayuh.

Ku iya, semua pemeri ke disau ngagai sida ke tasah angus endang asil pemeri ari bala kaban gerempung.

“Pemeri tu datai ari bala kaban JCI Mandrin Repok empu iya nya nyengkaum gari enggau barang guna ninting hari.

“Kami ngarapka udah tu agi bisi piak bukai datai mantu sida, laban naka tu sida chukup begunaka bantu ari mayuh piak napi pemar pengidup,” ku iya.

“Semua barang bantu nya udah dianjung ngagai peranak Rumah Mandau ngambika dibagi.