Ketuai ti mayuh penemu muntang ngatur rayat
Tu mih pugu pekara ke patut dikembuan bala Tuai Rumah tauka ketuai raban bansa, ku Harden
SRI AMAN: Genap Tuai Rumah tauka ketuai raban bansa ba rengat baruh patut ngembuan penemu ke mayuh laban nya pugu pekara ke patut dikembuan dikena ngatur menua ke dipegai diri.
Kebuah pia, genap tuai rumah tauka ketuai ke mayuh penemu sida deka ulih besemekih dalam nyungkak pengidup nembiak redak ke dipegai diri, pia ku Menteri Muda Pengintu Pengelantang Pendiau Komuniti, Datuk Francis Harden Hollis.
Iya madah, sida ke udah dipilih nyadi tuai rumah tauka ketuai raban bansa patut bejalaika pangku pengawa diri enggau bebendar, lurus, sereta meruan ngambika genap agenda pemansang ke diperambu perintah ulih dipejalika enggau manah ke pemaik mensia mayuh.
“Nyadi tuai rumah tauka ketuai raban bansa, beguna amat besaup enggau pangan diri lebih agi enggau nembiak redak ke dipegai, berandauka penanggul lalu berunding ngiga jalai mutar ngambika enda ngachau pengelantang orang bukai.
Enggau jaku puntang, sida patut nemu genap penanggul ke bisi nekul lalu anang sesekali napuk penanggul nya ari ditemu rayat laban nyema penanggul nya enda diputar iya deka meri pangka enda manah ngujungka nusah diri empu enggau orang bukai. Datuk Francis Harden Hollis Menteri Muda Pengintu Pengelantang Pendiau Komuniti
“Enggau jaku puntang, sida patut nemu genap penanggul ke bisi nekul lalu anang sesekali napuk penanggul nya ari ditemu rayat laban nyema penanggul nya enda diputar iya deka meri pangka enda manah ngujungka nusah diri empu enggau orang bukai,” ku iya.
Iya ke mega Kaban Kunsil Nengeri ( ADUN) Simanggang madah munyi nya rambau bejadika Pengerami Ngiling Tikai 2017 diatur Parti Sa’ati Rayat Sarawak (SUPP) Simanggang enggau Komiti Pemansang enggau Pengelikun Genturung Pendiau (JKKK) Rumah Thomas Ramba, Brangan Ulu, Nanga Skrang, Sri Aman ditu pagi kemari.
Kelimpah nya, ku iya genap tuai rumah enggau ketuai raban bansa mega diperansang ngerapitka kaul enggau ejensi perintah ngambika penanggul ke bisi nekul ulih teputar.
Kelimpah nya, tuai rumah enggau ketuai raban bansa mega patut pintar ngena servis sereta bantu ke bisi disediaka ejensi perintah dalam mutarka sebarang penanggul.
“Tuai Rumah enggau ketuai raban bansa patut muai ulah malu betemu enggau ejensi perintah sereta anang sesekali napuk penanggul nya ngambika ejensi perinath ulih mantu kita.
“Genap ejensi perintah ke ditumbuh endang ejensi pemantu rayat, nya kebuah Tuai Rumah enggau ketuai raban bansa patut nemu ngena servis bantu ke bisi disedia enggau manah,” ku iya.
Sama bisi datai Pemesai Kanan Bomba II, Opis Bomba enggau Penyah Penusah Sri Aman, Jilin Itar, Pemancha Lee Siang Hua, Ketuai Komiti Indu SUPP Simanggang, Ling Siew Hung, Sapit Chairman Kaunsil Pelilih Sri Aman (MDSA), Kaunselor Andar Suntai sereta bala kaban MDSA enggau kaban SUPP.
Ba pengerami nya, Harden bisi madah diri ngungkupka belanja ba taun 2018 ngagai JKKK Rumah Thomas Ramba penyampau RM 5,000 enggau RM 3,000 ngagai Biro Indu rumah panjai nya.