Pengerami Hari Raya ba lima genturung pendiau di Kabong tejanggal, suntuk ai
KABONG: Sekeda genturung pendiau ditu terus napi penanggul suntuk ai, sebedau pengerami Hari Raya Aidilfitri nyentuk kemari.
Penanggul tu ngujungka pengerami Hari Raya Aidilfitri ke diintu peranak lima genturung pendiau nya tejanggal sereta kurang pengerami laban bekelimat nguna ai ke ditimbun.
Entara genturung pendiau ke tejanggal tu iya nya Kampung Sungai Benang, Kampung Hulu Lintang, Kampung Hulu Laut, Kampung Masjid Lama enggau Kampung Hulu Tengah.
Nya alai dikena ngurangka penusah ke ditapi sida, piak bekaul bisi datai nganjung bekal ai ngagai sida.
Pemesai Pelilih, Kamaludin Haji Alkap madah, sebengkah aum ngenyit diatur begulai enggau ketuai raban bansa ba sitak nya sereta piak Opis Bekal Ai Menua Pesisir (JBALB) endur berundingka isu sereta ngiga chara mutarka penanggul nya.
“Aum nya mega digulu Kaban Kunsil Nengeri ( ADUN) N. 40 Kabong, Mohd. Chee Kadir lalu asil aum nya, pengawa nganjung ai ngena lori terus dipejalai.
“Nengah atur nya, agih RM6,000 udah dikena mayar ungkus kereban pengangkut dikena mantu mensia mayuhke suntuk bekal ai.
“Pengawa ngambi ai ari loji ditu enggau ba Nyabor. Nyema dua sitak tu tusah ngepam ai ngagai tangki piak sida deka ngambi ai ari Loji Lichok Roban,” ku iya.
Berebak enggau nya, bisi empat buah lori bejalaika pengawa nganjung ai berengkah pukul 7 pagi.
Ku Kamaludin, pengawa nganjung ai nya deka terus dipejalai sampai penanggul tu teputar.
Nya alai, peranak gen- turung pendiau ke suntuk ai tu minta penanggul tu diputarka piak bekaul enggau lengkas.