PBDSB mantah penerang Masing bekaul enggau ‘Nadai Tekad Ai, Nadai Jalai’
KUCHING: Parti Bansa Dayak Sarawak Baru (PBDS) enda berapa setuju enggau penerang ke dibantaika Sapit Kepala Menteri Tan Sri Datuk Amar James Masing bekaul enggau ‘No Dam, No Road’.
Semua rayat nyengkaum di menua pesisir bisi hak ngasaika pengelantang ari penyikap perengka guna mensia mayuh ti disediaka perintah taja pan ba kandang endur nya nadai ngemansutka penguntung ekonomi ngagai menua.
Penerang berita ari PBDSB bepenemu enda sampal orang besetuju penemu ke diban- taika Menteri Pemansang Infrastruktur enggau Perengka Pengangkut nya.
Perintah patut nyendiaka pemansang di menua pesisir enda ngira sekalika bisi projek besai tauka nadai, ngambika rayat ulih ngasaika penguntung engau pengelantang, ku PBDSB.
“Enda mayuh orang setuju enggau penerang ke dibantaika Sapit Kepala Menteri (Masing) iya nya perengka guna mensia mayuh baka jalai alun, jematan, kuasa karan, air beresi enggau ke bukai nadai rega ekonomi.
“Laban perengka guna nya endang patut disediaka perintah ngagai rayat. Nya alai perintah enda patut bekira enggau penguntung ekonomi ari semua nya,” ku PBDSB.
Peranak di menua Baram pan sebaka enggau rayat bukai di Sarawak iya nya bisi hak ngasaika pemansang perengka guna mensia mayuh ba kandang endur sida, ku PBDSB.
Peranak di kandang menua Baram mega patut diterangka nyema projek jalai nya disengkaum dalam pakej projek tekat nya.
PBDSB meri penerang nya pasal bekaul enggau penerang ke dibantai Sapit Kepala Menteri Tan Sri Datuk Amar James Masing dalam surat berita kemari ti bekaul enggau Jalai Long Lama-Ulu Baram diketuka berindik ari projek HEP Baram udah diketuka.
Ku Masing dalam penerang iya ensanus, jalai nya digaga endang nyadika jalai ke ditengah ngagai projek Tekad Hidro elektrik (HEP) Baram ke deka digaga.
Tang ku iya, bisi seraban peranak menua nya ti nagang pengawa ngaga HEP Baram nyentukka perintah ngaga pemutus ngetuka projek nya.